ഇന്ന് രണ്ടു മരണങ്ങള്‍ കോവിഡ് മൂലമാണെന്ന് സ്ഥിരീകരിച്ചു

തിരുവനന്തപുരം ജില്ലയില്‍ ഇന്ന്(29 സെപ്റ്റംബര്‍) 935 പേര്‍ക്കാണ് കോവിഡ് 19 സ്ഥിരീകരിച്ചത്. ഇതില്‍ 767 പേര്‍ക്കു സമ്പര്‍ക്കത്തിലൂടെയാണ് രോഗം ബാധിച്ചത്. 131 പേരുടെ ഉറവിടം വ്യക്തമല്ല. 30 പേര്‍ വീട്ടുനിരീക്ഷണത്തിലായിരുന്നു. നാലുപേര്‍ അന്യസംസ്ഥാനങ്ങളില്‍ നിന്നുമെത്തിയതാണ്. ഒരാള്‍ വിദേശത്തുനിന്നുമെത്തി. രണ്ടു പേരുടെ മരണം കോവിഡ് മൂലമാണെന്നും സ്ഥിരീകരിച്ചു.

നെടുമങ്ങാട് സ്വദേശി രവീന്ദ്രന്‍(61), പേട്ട സ്വദേശി വിക്രമന്‍(70) എന്നിവരുടെ മരണങ്ങളാണ് കോവിഡ് മൂലമാണെന്നു സ്ഥിരീകരിച്ചത്.

കോവിഡ് ഗുരുതരമായ സാഹചര്യത്തിൽ  വിവാഹം, മരണാനന്തരചടങ്ങുകൾ, മറ്റ് സാമൂഹ്യ ചടങ്ങുകൾ, രാഷ്ട്രീയ ചടങ്ങുകൾ തുടങ്ങി വിവിധ പരിപാടികളിൽ പങ്കെടുക്കാൻ കഴിയുന്നവരുടെ എണ്ണം നിജപ്പെടുത്തി പുതിയ ഉത്തരവിറക്കുമെന്ന് മുഖ്യമന്ത്രി പിണറായി വിജയൻ പറഞ്ഞു. ഇതുസംബന്ധിച്ച ചൊവ്വാഴ്ച നടന്ന സർവകക്ഷി യോഗം ചർച്ച ചെയ്തതായി മുഖ്യമന്ത്രി അറിയിച്ചു.

ഐ എച്ച് ആര്‍ ഡിയുടെ കീഴില്‍ മഹാത്മാ ഗാന്ധി സര്‍വകലാശാലയുമായി അഫിലിയേറ്റ് ചെയ്തിട്ടുള്ള അയിരൂര്‍ അപ്ലൈഡ് സയന്‍സ് കോളജില്‍ ബി എസ് സി കമ്പ്യൂട്ടര്‍ സയന്‍സ്, ബി കോം മോഡല്‍-3(കമ്പ്യൂട്ടര്‍ ആപ്ലിക്കേഷന്‍സ്), ബി എസ് സി ഫിസിക്‌സ് മോഡല്‍-2(കമ്പ്യൂട്ടര്‍ ആപ്ലിക്കേഷന്‍സ്) എന്നീ കോഴ്‌സുകളില്‍ കോളേജിന് അനുവദിച്ച 50 ശതമാനം സീറ്റുകളില്‍  പ്രവേശനത്തിന് അപേക്ഷിക്കാം. ഫോറവും പ്രോസ്‌പെക്ടസും വിവരങ്ങളും www.ihrd.ac.in  വെബ്‌സൈറ്റില്‍ ലഭിക്കും.
(പി.ആര്‍.കെ നമ്പര്‍ 2584/2020)

കൊല്ലം, ആലപ്പുഴ, ജില്ലകളിലെ പട്ടികവര്‍ഗ വിദ്യാര്‍ഥികള്‍ക്ക് 2021 ലെ നീറ്റ് എഞ്ചിനീയറിംഗ് പ്രവേശന പരിശീലനത്തിന് അപേക്ഷിക്കാം. 2020 മാര്‍ച്ചിലെ പ്ലസ് ടൂ സയന്‍സ്, കണക്ക് വിഷയമെടുത്ത് കുറഞ്ഞത് നാലു വിഷയത്തിനെങ്കിലും ബി ഗ്രേഡില്‍ കുറയാതെ വിജയിച്ചവരെയാണ് പരിഗണിക്കുക. വിദ്യാര്‍ഥികള്‍ പേര്, വിലാസം, ഫോണ്‍ നമ്പര്‍, രക്ഷകര്‍ത്താവിന്റെ സമ്മതപത്രം, പ്ലസ് ടൂ പരീക്ഷയുടെ സര്‍ട്ടിഫിക്കറ്റ്, ജാതി, വരുമാന സര്‍ട്ടിഫിക്കറ്റുകളുടെ പകര്‍പ്പുകള്‍ സഹിതം അപേക്ഷ സെപ്തംബര്‍ 30 നകം പുനലൂര്‍ ട്രൈബല്‍ ഡെവലപ്‌മെന്റ് ഓഫീസില്‍ നല്‍കണം.
(പി.ആര്‍.കെ നമ്പര്‍ 2583/2020)

ജില്ലാ കലക്ടറുടെ ഓണ്‍ലൈന്‍ പരാതി പരിഹാര അദാലത്തില്‍ ഒക്‌ടോബര്‍ അഞ്ചിന് രാവിലെ 11 ന് കൊല്ലം താലൂക്കിലെ പരാതികള്‍ കേള്‍ക്കും. ഈസ്റ്റ് കല്ലട, മുളവന, കണ്ണനല്ലൂര്‍, നെടുങ്ങോലം എം എല്‍ എ ജംഗ്ഷന്‍, കൊട്ടിയം, മൂന്നാംകുറ്റി, കൊല്ലം പള്ളിമുക്ക്, തങ്കശ്ശേരി കാവല്‍ ജംഗ്ഷന്‍ എന്നിവിടങ്ങളിലെ അക്ഷയകേന്ദ്രങ്ങള്‍ വഴി പരാതി രജിസ്റ്റര്‍ ചെയ്യാം. കലക്ടര്‍ ഓണ്‍ലൈനായി കേട്ട് തീര്‍പ്പാക്കാന്‍ കഴിയുന്നവ അദാലത്തില്‍ തന്നെ തീര്‍പ്പാക്കും. ഫോണ്‍:0474-2793473.
(പി.ആര്‍.കെ നമ്പര്‍ 2582/2020)

കേരള മോട്ടോര്‍ തൊഴിലാളി ക്ഷേമനിധി ബോര്‍ഡിലെ സ്‌കാറ്റേര്‍ഡ് വിഭാഗം തൊഴിലാളികള്‍ക്ക് കോവിഡ് 19 ധനസഹായത്തിനുള്ള അപേക്ഷ ഒക്‌ടോബര്‍ 31 വരെ സമര്‍പ്പിക്കാമെന്ന് ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു. ഫോണ്‍: 0474-2749334.
(പി.ആര്‍.കെ നമ്പര്‍ 2581/2020)

കേരള മോട്ടോര്‍ തൊഴിലാളി ക്ഷേമനിധി പദ്ധതിയില്‍ അംഗത്വമുള്ളവരുടെ കുടിശ്ശികകള്‍ ഒന്‍പത് ശതമാനം പലിശ സഹിതം ഒക്‌ടോബര്‍ 31 വരെ ഒടുക്കാമെന്ന് ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു. ഫോണ്‍: 0474-2749334.
(പി.ആര്‍.കെ നമ്പര്‍ 2580/2020)

ഐ എച്ച് ആര്‍ ഡി യുടെ നിയന്ത്രണത്തിലുള്ള കരുനാഗപ്പള്ളി മോഡല്‍ പോളിടെക്‌നിക്ക് കോളേജില്‍ ഗസ്റ്റ് കമ്പ്യൂട്ടര്‍ പ്രോഗ്രാമറുടെ നിയമനം നടത്തുന്നതിനുള്ള അഭിമുഖം ഒക്‌ടോബര്‍ ഏഴിന് രാവിലെ 10 ന് നടക്കും. യോഗ്യത - ബി എസ് സി കമ്പ്യൂട്ടര്‍ സയന്‍സ് ഫസ്റ്റ് ക്ലാസ്സ്, സര്‍ക്കാര്‍ അംഗീകൃത പി ജി ഡി സി എ. ഉദ്യോഗാര്‍ഥികള്‍ അസല്‍ സര്‍ട്ടിഫിക്കറ്റും സാക്ഷ്യപ്പെടുത്തിയ രണ്ട് പകര്‍പ്പുകളുമായി എത്തണം.
(പി.ആര്‍.കെ നമ്പര്‍ 2579/2020)

മത്സ്യത്തൊഴിലാളി ക്ഷേമനിധി ബോര്‍ഡില്‍ രജിസ്റ്റര്‍ ചെയ്ത മത്സ്യത്തൊഴിലാളികളുടെ മക്കളില്‍ ബിരുദതലത്തില്‍ 60 ശതമാനം മാര്‍ക്കോടെ ജയിച്ചവര്‍ക്ക് ഫിഷറീസ് വകുപ്പ് മുഖാന്തിരം സിവില്‍ സര്‍വീസ് പരീക്ഷാ പരിശീലനം നല്‍കും. പരിശീലന ചെലവ് സര്‍ക്കാര്‍ വഹിക്കും. അപേക്ഷാ ഫോമും വിശദ വിവരങ്ങളും സിവില്‍ സ്റ്റേഷനിലെ ഫിഷറീസ് ഡെപ്യൂട്ടി ഡയറക്ടര്‍ ഓഫീസില്‍ ലഭിക്കും. ഒക്‌ടോബര്‍ ഏഴിനകം സമര്‍പ്പിക്കണം. വിശദ വിവരങ്ങള്‍ 0474-2792850 നമ്പരില്‍ ലഭിക്കും.
(പി.ആര്‍.കെ നമ്പര്‍ 2578/2020)

രജിസ്‌ട്രേഷനും ലൈസന്‍സും ഇല്ലാതെ പ്രവര്‍ത്തിക്കുന്ന ഊന്നി, ചീനവലകള്‍ ഒക്‌ടോബര്‍ 15 നകം നീക്കം ചെയ്യണമെന്ന് ഫിഷറീസ് ഡെപ്യൂട്ടി ഡയറക്ടര്‍ അറിയിച്ചു. ഇല്ലാത്തപക്ഷം കേരള ഇന്‍ലാന്‍ഡ് ഫിഷറീസ് ആന്റ് അക്വാകള്‍ച്ചര്‍ ആക്ട് പ്രകാരം തുടര്‍നടപടികള്‍ സ്വീകരിച്ച് വലകള്‍ നീക്കം ചെയ്യും. ഫിഷറീസ് വകുപ്പില്‍ രജിസ്റ്റര്‍ ചെയ്തിട്ടുള്ള ഊന്നി, ചീനവലകളുടെ കരകുടിശ്ശിക അടച്ച് ലൈസന്‍സ് പുതുക്കാത്തവര്‍ ഉടന്‍ പുതുക്കണമെന്നും ഫിഷറീസ് ഡി ഡി അറിയിച്ചു.
(പി.ആര്‍.കെ നമ്പര്‍ 2577/2020)