സംസ്ഥാനത്തെ 98 ശതമാനം റോഡുകളും ഗതാഗതയോഗ്യമാക്കുവാന്‍ കഴിഞ്ഞതായി മുഖ്യമന്ത്രി പിണറായി വിജയന്‍ പറഞ്ഞു. പൊതുമരാമത്ത് വകുപ്പിന്റെ കീഴിലുള്ള 9530 കിലോ മീറ്റര്‍ റോഡ് ഇതില്‍ ഉള്‍പ്പെടും. പ്രളയകാലത്ത് തകര്‍ന്നുപോയ ആയിരം കിലോമീറ്ററോളം റോഡ്, നൂറിലധികം പാലങ്ങള്‍ ഇതിനകം അറ്റകുറ്റപ്പണി പൂര്‍ത്തികരിച്ചിട്ടുണ്ട്. റോഡ് നവീകരണ പ്രവര്‍ത്തികളും നടക്കുന്നുണ്ടെന്നും മുഖ്യമന്ത്രി പറഞ്ഞു.

പത്തനംതിട്ട ജില്ലയില്‍ കിഫ്ബി പദ്ധതിയിലൂടെ നവീകരിച്ച മണ്ണാറകുളഞ്ഞി-കോഴഞ്ചേരി റോഡിന്റെ ഉദ്ഘാടനവും ഉപദേശിക്കടവ് പാലത്തിന്റെ ശിലാസ്ഥാപന ഉദ്ഘാടനവും നിര്‍വഹിച്ചു സംസാരിക്കുകയായിരുന്നു മുഖ്യമന്ത്രി. 

പത്തനംതിട്ട  ജില്ലാ സഹകരണ ആശുപത്രി സൊസൈറ്റി ഓഫീസ് ഇലന്തൂര്‍ പാലച്ചുവട് ജംഗ്ഷനില്‍ പ്രവര്‍ത്തനം ആരംഭിച്ചു. ഓഫീസിന്റെ ഉദ്ഘാടനം വീണാ ജോര്‍ജ് എം.എല്‍.എ നിര്‍വഹിച്ചു.  ആതുരസേവന രംഗത്ത് മിതമായ നിരക്കില്‍ നൂതന  ചികിത്സാ സേവനം  സാധാരണ ജനങ്ങള്‍ക്ക് ലഭ്യമാക്കുക എന്നതാണ്  ജില്ലാ സഹകരണ സംഘം ആശുപത്രിയുടെ ലക്ഷ്യം. നവംബര്‍ ആദ്യവാരത്തോടെ ജില്ലാ സഹകരണ ആശുപത്രി നാടിന് സമര്‍പ്പിക്കും.  പ്രവര്‍ത്തനങ്ങള്‍ ഏകോപിപ്പിക്കാനുളള ഓഫീസ് പ്രവര്‍ത്തനമാണ് ആരംഭിച്ചത്. 

വനിതാ ശിശു വികസന വകുപ്പിന് കീഴില്‍ ഇലന്തൂര്‍  ഐ.സി.ഡി.എസ് പ്രോജക്ട് പരിധിയിലുളള ചെറുകോല്‍, നാരങ്ങാനം, ചെന്നീര്‍ക്കര, ഓമല്ലൂര്‍, മല്ലപ്പുഴശ്ശേരി, കോഴഞ്ചേരി, ഇലന്തൂര്‍ എന്നീ ഗ്രാമപഞ്ചായത്തുകളിലെ  അങ്കണ വാടികളിലേക്ക്  വര്‍ക്കര്‍/ ഹെല്‍പ്പര്‍ തസ്തികകളില്‍ നിയമനത്തിന്  അപേക്ഷകള്‍ ക്ഷണിച്ചു.  അപേക്ഷകര്‍  2020 ജനുവരി ഒന്നിന് 18 വയസ് പൂര്‍ത്തിയായവരും 46 വയസ് കഴിയാത്തവരുമായിരിക്കണം.  

  തണ്ണിത്തോട് ഗ്രാമപഞ്ചായത്തിലെ കണ്ടെയ്ന്‍മെന്റ് സോണില്‍ ഉള്‍പ്പെട്ട് സെപ്റ്റംബര്‍ 10 മുതല്‍ അടഞ്ഞുകിടന്നിരുന്ന അടവി ഇക്കോ ടൂറിസം പദ്ധതിയുടെ ഭാഗമായുള്ള മുണ്ടോമൂഴി കുട്ടവഞ്ചി സവാരി കേന്ദ്രം വ്യാഴാഴ്ച (സെപ്റ്റംബര്‍ 17) മുതല്‍ പ്രവര്‍ത്തനം ആരംഭിച്ചതായി കോന്നി ഡി.എഫ്.ഒ  കെ.എന്‍ ശ്യാംമോഹന്‍ലാല്‍ അറിയിച്ചു. 

ഞായറാഴ്ച ഉള്‍പ്പെടെ എല്ലാ ദിവസവും രാവിലെ 8.30 മുതല്‍ 5.30 വരെ കുട്ടവഞ്ചി സവാരി കേന്ദ്രം പ്രവര്‍ത്തിക്കും. ഫോണ്‍: 7025263433

കുന്നന്താനം പഞ്ചായത്തില്‍ കുടുംബശ്രീയുടെ നേതൃത്വത്തില്‍ ആരംഭിച്ച ജനകീയ ഹോട്ടല്‍ ആഞ്ഞിലിത്താനത്ത് മാത്യു ടി തോമസ് എം.എല്‍.എ ഉദ്ഘാടനം ചെയ്തു.  മല്ലപ്പള്ളി താലൂക്കിലെ ആദ്യത്തെ ജനകീയ ഹോട്ടലാണ് കുന്നന്താനം പഞ്ചായത്തിന്റെ കീഴിലാരംഭിച്ച ഈ ജനകീയ ഹോട്ടല്‍. 

    പതിനൊന്നാം വാര്‍ഡിലെ കുടുംബശ്രീ പ്രവര്‍ത്തകരാണ് ജനകീയ ഹോട്ടല്‍ പ്രാവര്‍ത്തികമാക്കിയത്. ജില്ലാ പഞ്ചായത്ത് അംഗം എസ്.വി.സുബിന്‍, പഞ്ചായത്ത് പ്രസിഡന്റ് രാധാകൃഷ്ണക്കുറുപ്പ് തുടങ്ങിയവര്‍ പങ്കെടുത്തു

നടപ്പാക്കുന്നത് ഒന്നരക്കോടി രൂപയുടെ വികസന പ്രവൃത്തി

ബ്രിട്ടീഷുകാരാൽ നിർമിക്കപ്പെട്ട തിരൂർ ബേപ്പൂർ പാതയിലെ ആദ്യ റെയിൽവേ സ്റ്റേഷനുകളിലൊന്നായ താനൂര്‍ റെയില്‍വേ സ്റ്റേഷന്റെ മുഖച്ഛായ മാറുന്നു. വി അബ്ദുറഹിമാന്‍ എംഎല്‍എയുടെ ആസ്തി വികസന ഫണ്ടിൽ നിന്നും ഒന്നരക്കോടി രൂപ ചെലവിലാണ് റെയിൽവേ സ്റ്റേഷൻ വികസന പ്രവർത്തനങ്ങൾ നടത്തുന്നത്.  

ഇരുമ്പുഴി വടക്കുംമുറി ജി.എം.എല്‍.പി സ്‌കൂളില്‍ നിര്‍മിച്ച ആധുനിക കെട്ടിടം പി. ഉബൈദുള്ള എം.എല്‍.എ ഉദ്ഘാടനം ചെയ്തു. പി. ഉബൈദുള്ള എം.എല്‍.എയുടെ ആസ്തിവികസന ഫണ്ടില്‍ നിന്ന് അനുവദിച്ച 40 ലക്ഷം രൂപ ചെലവില്‍ നിര്‍മിച്ച കെട്ടിട്ടത്തില്‍  നാല് ക്ലാസ് മുറികളും ഓപ്പണ്‍ ഓഡിറ്റോറിയവും ശുചി മുറി സംവിധാനങ്ങളുമാണുള്ളത്.  മലപ്പുറം ബ്ലോക്ക് പഞ്ചായത്ത്  പ്രസിഡന്റ് കെ.സലീന ടീച്ചര്‍, സി.കെ.ശിഹാബ്, പി.പി. ഹഫ്‌സത്ത്,  പി.കെ.കുഞ്ഞിമോന്‍, രജനി മോഹന്‍ദാസ്, പ്രധാനധ്യാപിക ജമുന, പി.ടി.എ പ്രസിഡന്റ് പി.ബി.ബഷീര്‍, വൈസ് പ്രസിഡന്റ് നബീല്‍, എം.ടി.എ പ്രസിഡന്റ് ഷെറീന തുടങ്ങിയവര്‍ പങ്കെടുത്തു.