ലോക് ഡൗണില്‍  അന്യസംസ്ഥാന തൊഴിലാളികള്‍  പ്രതിസന്ധിയിലാകാതെ  അവരുടെ  ക്ഷേമം അന്വേഷിച്ചും അവശ്യസാധനങ്ങള്‍ എത്തിച്ചും കട്ടപ്പന നഗരസഭയുടെ സഹായ ഹസ്തം. നഗരസഭ ആരോഗ്യ വിഭാഗത്തിന്റയും വില്ലേജ് ഓഫീസിന്റെയും നേതൃത്വത്തില്‍ അതിഥി തൊഴിലാളികള്‍ താമസിക്കുന്ന സ്ഥലങ്ങളില്‍ വിവരശേഖരണം നടത്തി. ഭക്ഷ്യസാധനങ്ങള്‍ കുറവുള്ള ഇടങ്ങളില്‍  അവശ്യസാധനങ്ങള്‍ എത്തിച്ചു നല്കി. വിവിധ സന്നദ്ധ സംഘടനകളും വ്യക്തികളും എത്തിച്ച നല്കിയ സാധനങ്ങള്‍ നഗരസഭയുടെയും ആരോഗ്യ വിഭാഗത്തിന്റെയും വില്ലേജ് ഓഫീസിന്റെയും സഹകരണത്തോടെ ശേഖരിച്ച് തൊഴിലാളികളുടെ താമസസ്ഥലത്ത് എത്തിച്ചു നല്കുകയാണ്.

കോവിഡ് 19 പ്രതിരോധത്തിന്റെ ഭാഗമായി ലോക്ക് ഡൗണ്‍ പ്രഖ്യാപിച്ചതിനെ തുടര്‍ന്ന് സംസ്ഥാന സര്‍ക്കാര്‍ നിര്‍ദ്ദേശത്തിന്റെ അടിസ്ഥാനത്തില്‍ തൊടുപുഴ നഗരസഭയുടെ നേതൃത്വത്തില്‍ തുടങ്ങിയ സമൂഹ അടുക്കള നിരവധിയാളുകള്‍ക്ക് ആശ്വാസമായി.  തൊടുപുഴ ആനക്കൂട് ജംഗ്ഷനിലെ അമൃതാ കേറ്ററിങ് സര്‍വീസിന്റെ കെട്ടിടത്തിലാണ് സമൂഹ അടുക്കള പ്രവര്‍ത്തിക്കുന്നത്.  ദിവസം മൂന്ന് നേരമാണ് ഇവിടെ നിന്നും ഭക്ഷണം നല്‍കുന്നത്. ആദ്യ ദിവസങ്ങളില്‍ നിശ്ചിത കേന്ദ്രത്തിലെത്തുന്നവര്‍ക്കാണ് ഭക്ഷണം വിതരണം ചെയ്തിരുന്നതെങ്കില്‍ ഇപ്പോള്‍ അര്‍ഹരായവര്‍ക്ക് താമസ സ്ഥലത്ത് പൊതിയായി എത്തിച്ച് നല്‍കുന്നുമുണ്ട്.

മദ്യം, പുകവലി തുടങ്ങിയ ലഹരിവസ്തുക്കള്‍ക്ക് അടിമപ്പെട്ട് മാനസിക സംഘര്‍ഷം നേരിടുന്നവര്‍ക്ക് ആശ്വാസം നല്‍#ോകുന്നതിന് തിരുവനന്തപുരം ശാന്തിഗ്രാം സൊസൈറ്റിയുടെ സഹകരണത്തോടെ ജില്ലാ നെഹ്‌റു യുവകേന്ദ്ര ശാന്തിതീരം സൗജന്യ ഓണ്‍ലൈന്‍ കൗണ്‍സിലിംഗ് ഹബ്ബ് തുടങ്ങി. വിവരങ്ങള്‍ക്ക് ഫോണ്‍ 9961432303, 9207198386, 7356025516, 8156980450.

എല്ലാവര്‍ക്കും ഭക്ഷണം എന്ന ആശയം ഉള്‍ക്കൊണ്ട് കൊണ്ട് സര്‍ക്കാര്‍ നടപ്പിലാക്കുന്ന കമ്മ്യൂണിറ്റി കിച്ചണിലേക്ക് സൗജന്യമായി പാല്‍ നല്‍കി ഇടുക്കി ജില്ലയിലെ മൂന്നാര്‍ ബ്ലോക്ക് ലക്ഷ്മി ക്ഷീരസംഘം,  ജില്ലയിലെ ക്ഷീരസംഘങ്ങള്‍ക്ക് മാതൃകയായി. മൂന്നാര്‍ കമ്മ്യൂണിറ്റി കിച്ചനിലേയ്ക്ക് ലക്ഷ്മി ക്ഷീരസംഘം പാല്‍ നല്‍കുന്നതിന്റെ ഉദ്ഘാടനം മൂന്നാര്‍ ഗ്രാമപഞ്ചായത്ത് പ്രസിഡണ്ട്  കറുപ്പുസ്വാമി നിര്‍വഹിച്ചു. എല്ലാ ദിവസവും കമ്മ്യൂണിറ്റി കിച്ചനിലേയ്ക്ക്  10 ലിറ്റര്‍ പാല്‍ വീതം സൗജന്യമായി നല്‍കുമെന്ന് സംഘം പ്രസിഡണ്ട്  ആര്‍ ഗുരുസ്വാമി, സംഘം സെക്രട്ടറി  വിജയകുമാര്‍ എന്നിവര്‍ അറിയിച്ചു.

കൊറോണയുടെ മുന്‍കരുതലായി പത്തു വയസ്സിനു താഴെയുള്ള കുട്ടികളോ 65 വയസ്സിനു മേലെയുള്ളവരോ ക്ഷീരസംഘങ്ങളില്‍ പാല്‍ നല്‍കുവാനോ വാങ്ങുവാനോ പോകരുത് എന്ന് ക്ഷീരവികസനവകുപ്പ് നിര്‍ദ്ദേശിച്ചു. ചുമ, പനി, ജലദോഷം മുതലായവ ഉള്ളവര്‍ ക്ഷീരസംഘങ്ങളിലോ ക്ഷീരവികസനവകുപ്പിന്റെ ഓഫീസുകളിലോ സന്ദര്‍ശിക്കരുത്. പാല്‍ സംഭരിക്കുന്നതിന് അഞ്ചു പേരില്‍ കൂടുതല്‍ ഒരു സമയത്ത്  കൂടരുത്. പാല്‍ അളക്കുന്നവര്‍ തമ്മില്‍ ഒരു മീറ്ററില്‍ അധികം അകലം പാലിക്കണം. സംഘങ്ങളില്‍ അണുനാശിനി , കൈ കഴുകാനുള്ള സോപ്പ്,  സാനിറ്റൈസര്‍, മാസ്‌ക് എന്നിവ വാങ്ങുന്നതിനുള്ള അനുമതി നല്‍കിയിട്ടുണ്ട്.

പൊതുഭരണ വുപ്പ് പ്രിന്‍സിപ്പല്‍ സെക്രട്ടറിയുടെ നിര്‍ദ്ദേശ പ്രകാരം സെന്‍സസ് 2021 പ്രവര്‍ത്തനം ഇനിയൊരറിയിപ്പ് ഉണ്ടാകുന്നതുവരെ നിര്‍ത്തിവച്ചതായി ജില്ലാകലക്ടര്‍ എച്ച്. ദിനേശന്‍ അറിയിച്ചു.

കോവിഡ് -19 അടിയന്തിര സാഹചര്യത്തിന്റെ പശ്ചാത്തലത്തില്‍ സര്‍ക്കാര്‍ നിര്‍ദ്ദേശ പ്രകാരം ജില്ലയില്‍ ഭക്ഷ്യ വസ്തുക്കളുടെ ലഭ്യത, ഹോം ഡെലിവറി, അളവ് തൂക്ക തട്ടിപ്പ്, അമിതവില, പൂഴ്ത്തിവയ്പ്, ചരക്ക് ഗതാഗതം തുടങ്ങിയ വിഷയങ്ങളില്‍ പരിശോധന നടത്തി നിയമ വിരുദ്ധമായി പ്രവര്‍ത്തിക്കുന്നവരെ കണ്ടെത്തുന്നതിനും കര്‍ശന നടപടി സ്വീകരിക്കുന്നതിനുമായി ജില്ലാകലക്ടര്‍ ചെയര്‍മാനായും ജില്ലാ സപ്ലൈ ഓഫീസര്‍, അസിസ്റ്റന്റ് കണ്‍ട്രോളര്‍ ലീഗല്‍ മെട്രോളജി എന്നിവര്‍ അംഗങ്ങളായും പ്രത്യേക സമിതി രൂപീകരിച്ചു. സമിതി നിര്‍ദ്ദേശ പ്രകാരം ജില്ലയിലെ വിവിധ താലൂക്കുകളില്‍ പൊതുവിപണിയിലെ വില നിലവാരം പരിശോധിച്ചു.