ജോലിയില്‍നിന്നും വിരമിച്ച റവന്യൂ ജീവനക്കാരുടെ കൂട്ടായ്മയായ 'ഓര്‍മ' മുഖ്യമന്ത്രിയുടെ ദുരിതാശ്വാസ നിധിയിലേക്ക് ഒരുലക്ഷം രൂപ സംഭാവന നല്‍കി.  'ഓര്‍മ' പ്രസിഡന്റും മുന്‍ ജില്ലാ കലക്ടറുമായ ടി.ഭാസ്‌കരന്‍ ജില്ലകലക്ടര്‍ സംബശിവറാവുവിന് ചെക്ക് കൈമാറി. എഡിഎം റോഷ്‌നി നാരായണന്‍,  'ഓര്‍മ' സെക്രട്ടറി അബ്ദുള്‍ അസീസ്, വൈസ് പ്രസിഡന്റ് കെ.കെ.വിജയന്‍, കെ.രാധാകൃഷ്ണന്‍ എന്നിവര്‍ പങ്കെടുത്തു.

തീരദേശത്ത്  വേലിയേറ്റ മേഖലയില്‍ നിന്നും  50 മീറ്ററിനുളളില്‍ താമസിക്കുന്ന മത്സ്യത്തൊഴിലാളി കുടുംബങ്ങളെ സുരക്ഷിത മേഖലയില്‍ പുനരധിവസിപ്പിക്കുന്ന 'പുനര്‍ഗേഹം' പദ്ധതിക്ക് ജില്ലയില്‍ തുടക്കമായി.  ജില്ലാതല ഉദ്ഘാടനം സി.കെ നാണു എംഎല്‍എ വടകര നഗരസഭാങ്കണത്തില്‍ കോവിഡ് മാനദണ്ഡങ്ങള്‍ പാലിച്ച് നിര്‍വ്വഹിച്ചു.

വെള്ളപ്പൊക്ക ദുരന്തനിവാരണവുമായി ബന്ധപ്പെട്ട് ഇന്‍സിഡന്റ് റെസ്‌പോണ്‍സ് സിസ്റ്റത്തിന്റെ (ഐ.ആര്‍.എസ്) ഭാഗമായി ആറന്മുള പഞ്ചായത്തിലെ എഴിക്കാട് കോളനിയില്‍ ജൂലൈ രണ്ടിന്(വ്യാഴം) മോക്ഡ്രില്‍ നടത്തും. ഇതിനുമുന്നോടിയായി റെസ്‌പോണ്‍സിബിള്‍ ഓഫീസര്‍ എല്‍.ആര്‍. ഡെപ്യൂട്ടി കളക്ടര്‍ ആര്‍.രാജലക്ഷ്മിയുടെ അധ്യക്ഷതയില്‍ കോഴഞ്ചേരി താലൂക്ക് ഓഫീസില്‍ യോഗം ചേര്‍ന്നു. മോക്ഡ്രില്‍ നടത്തുന്നതിനായി ഐ.ആര്‍.എസ് സംഘം സ്ഥലം സന്ദര്‍ശിച്ചു സാഹചര്യം വിലയിരുത്തി. 

ബലാത്സംഗ കേസുകളും പോക്‌സോ കേസുകളും അതിവേഗത്തില്‍ തീര്‍പ്പാക്കുന്നതിന് സംസ്ഥാനത്ത് സജ്ജമാക്കിയ ഫാസ്റ്റ് ട്രാക്ക് സ്പെഷ്യല്‍ കോര്‍ട്ട് ഉദ്ഘാടനം ഇന്ന് (ജൂണ്‍ 30) മൂന്ന് മണിക്ക് മുഖ്യമന്ത്രി പിണറായി വിജയനും  ഹൈക്കോടതി ചീഫ് ജസ്റ്റീസ് എസ്. മണികുമാറും ചേര്‍ന്ന് നിര്‍വ്വഹിക്കും.  സംസ്ഥാനത്ത് നിലവില്‍ വരുന്ന 17 ഫാസ്റ്റ് ട്രാക്ക് സ്പെഷ്യല്‍ കോടതികളില്‍ ജില്ലയില്‍നിന്നും കോഴിക്കോട്, കൊയിലാണ്ടി കോടതികളും ഉള്‍പ്പെടുത്തിയിട്ടുണ്ട്.  വീഡിയോ കോണ്‍ഫറന്‍സ് മുഖേനയാണ് ഉദ്ഘാടനം.