ജില്ലയിൽ നിന്ന് അഞ്ച് പേർക്കാണ് രോഗം സ്ഥിരീകരിച്ചത് . ഇതിൽ നാലു പേർ മുംബൈയിൽ നിന്നും ഒരാൾ വിദേശത്തു നിന്നും വന്നതാണ്. മെയ് 25ന് മുംബയിൽ നിന്നും ട്രെയിൻ മാർഗം കൊച്ചിയിൽ എത്തി തുടർന്ന് ജില്ലയിൽ കോവിഡ് കെയർ സെന്ററിൽ നിരീക്ഷണത്തിൽ ആയിരുന്ന
 അമ്പലപ്പുഴ സ്വദേശിയായ യുവാവ് , ചമ്പക്കുളം സ്വദേശിയായ യുവാവ് , 58 വയസുള്ള കരുവാറ്റ സ്വദേശി , തൈക്കാട്ടുശേരി സ്വദേശിയായ യുവാവ് എന്നിവർക്ക് കോവിഡ് സ്ഥിരീകരിച്ചു .

 
ആലപ്പുഴ: ജില്ലയിലെ മുഴുവൻ വിദ്യാർത്ഥികളെയും ഓൺലൈൻ വിദ്യാഭ്യാസ പരിപാടിയിൽ ഉൾപ്പെടുത്തുന്നതിന് ഉടൻ സംവിധാനമൊരുങ്ങും. സാമ്പത്തിക ശേഷിയില്ലെന്നതുകൊണ്ട് ഒരു വിദ്യാർത്ഥിക്കും ഓൺലൈൻ വിദ്യാഭ്യാസം ലഭിക്കാത്ത സാഹചര്യം വരില്ലെന്നുറപ്പാക്കാൻ ജില്ലാപഞ്ചായത്ത് പ്രസിഡന്റ് ജി വേണുഗോപാലിന്റെയും ജില്ലാകളക്ടർ എ അലക്‌സാണ്ടറിന്റെയും നേതൃത്വത്തിൽ കളക്ടറുടെ ചേംബറിൽ വിളിച്ചുചേർത്ത യോഗത്തിലാണ് തീരുമാനം. 

ആലപ്പുഴ: ക്വാറന്റൈനുമായി ബന്ധപ്പെട്ട് മാനസിക പിരിമുറക്കമനുഭവിക്കുന്നവര്‍ക്ക് ഭാരതിയ ചികിത്സ വകുപ്പിന്റെയും നാഷണല്‍ ആയുഷ് മിഷന്റെയും സേവനം ടെലി കൗണ്‍സിലിങ്ങിലുടെ ലഭിക്കും. വീടുകളിലും സ്ഥാപനങ്ങളിലുമായി നിരീക്ഷണത്തില്‍ കഴിയുന്നവര്‍ക്കും കൊറോണ ഭീതിയുള്ളവര്‍ക്കും ഓണ്‍ലൈന്‍ ക്ലാസിനെയും പരീക്ഷയെയും കുറിച്ചോര്‍ത്ത് ടെന്‍ഷനുള്ള വിദ്യാര്‍ഥികള്‍ക്കും ജോലി, കുടുംബം തുടങ്ങി മറ്റു കാരണങ്ങളാല്‍ മാനസിക സമ്മര്‍ദ്ദമനുഭവിക്കുന്നവര്‍ക്കും കൗണ്‍സിലിംഗിനായി രാവിലെ ഒമ്പതു മുതല്‍ വൈകിട്ട് നാലു വരെ വിളിക്കാം. ഫോണ്‍ 9747082571, 9497466150, 9495143180

ആലപ്പുഴ: പരിസ്ഥിതി ദിനാചരണത്തിന്റെ ഭാഗമായി ജില്ല മെഡിക്കല്‍ ഓഫീസില്‍ പച്ചക്കറിത്തോട്ടം സജ്ജീകരിച്ചു. ആശുപത്രി പരിസരം ശുചിയാക്കി. പരിസ്ഥിതി ദിനാചരണത്തിന്റെ ഉദ്ഘാടനം ജില്ല മെഡിക്കല്‍ ഓഫീസര്‍ ഡോ.എല്‍. അനിതകുമാരി നിര്‍വ്വഹിച്ചു. എല്ലാ ആരോഗ്യ സ്ഥാപനങ്ങളിലും ശുചിത്വ ക്യാമ്പയിന്‍ നടന്നു. തദ്ദേശ സ്വയംഭരണ സ്ഥാപനങ്ങളുടെ സഹകരണത്തോടെ വൃക്ഷത്തൈകള്‍ നട്ടു. പകര്‍ച്ചവ്യാധികളുടെ പശ്ചാത്തലത്തില്‍ ഡെങ്കിപ്പനി, എലിപ്പനി തുങ്ങിയവ നിയന്ത്രിക്കുന്നതിന്റെ ഭാഗമായി ആശുപത്രികളും പരിസരവും ശുചിയാക്കി. കൊതുകിന്റെ ഉറവിട നശീകരണ പ്രവര്‍ത്തനങ്ങളും നടന്നു.

ആലപ്പുഴ ജില്ലയില്‍നിന്നും മടങ്ങിപ്പോകാന്‍ ആഗ്രഹിക്കുന്ന മറ്റു സംസ്ഥാനക്കാർ  നാളെ(ജൂണ്‍ ആറ്) വൈകുന്നേരം അഞ്ചിനു മുന്‍പ് വിവരം നല്‍കണമെന്ന് ജില്ലാ കളക്ടര്‍ അറിയിച്ചു. 

പേര്, സ്വദേശത്തെ പൂര്‍ണ മേല്‍വിലാസം, ജില്ല, സംസ്ഥാനം ഫോണ്‍ നമ്പര്‍, ആലപ്പുഴ ജില്ലയില്‍ എത്തിയത് എന്തിന്,  ഇവിടുത്തെ വിലാസം, എന്നിവ 0477 2239040
 എന്ന ഫോണ്‍ നമ്പരില്‍ നല്‍കണം. warroomalp@gmail.com എന്ന ഈ മെയില്‍ വിലാസത്തിലും വിവരങ്ങള്‍ അയയ്ക്കാം.

പ്രകൃതിക്ഷോഭം മൂലം ദുരിതാശ്വാസ ക്യാമ്പുകള്‍ തുറക്കേണ്ട സാഹചര്യമുണ്ടായാല്‍ കെട്ടിടങ്ങള്‍ ഉള്‍പ്പെടെ സജ്ജീകരണങ്ങള്‍ മുന്‍കൂര്‍ തയ്യാറാക്കുന്നതിന് സര്‍ക്കാര്‍ പുറപ്പെടുവിച്ച നിര്‍ദ്ദേശം കാലതാമസം കൂടാതെ നടപ്പാക്കുന്നുവെന്ന് തദ്ദേശ സ്ഥാപനങ്ങള്‍ ഉറപ്പാക്കണം. കോവിഡിന്റെ പശ്ചാത്തലത്തില്‍, പ്രായമായവര്‍ക്കും രോഗം എളുപ്പത്തില്‍ ബാധിക്കാനിടയുള്ളവര്‍ക്കും  പ്രത്യേക കെട്ടിടമൊരുക്കും. 

വൈദ്യുതി തടസവും അപകടങ്ങളും ഒഴിവാക്കാന്‍ എമര്‍ജന്‍സി റിസ്‌റ്റൊറേഷന്‍ ടീം (ഇ ആര്‍ ടി) എന്നപേരില്‍ അടിയന്തര സംഘത്തിന് രൂപം നല്‍കിയതായി കെ എസ് ഇ ബി അധികൃതര്‍ അറിയിച്ചു. ദ്രവിച്ച ഇലക്ട്രിക് പോസ്റ്റുകള്‍ മാറ്റുന്നതും അപകടകരമായ രീതിയില്‍ നില്‍ക്കുന്ന മരങ്ങളുടെ ചില്ലുകള്‍ വെട്ടിമാറ്റുന്നതും താഴ്ന്നുകിടക്കുന്ന വൈദ്യുത കമ്പികള്‍ ഉയര്‍ത്തുന്നതും തകരാറിലായ ട്രാന്‍സ്‌ഫോര്‍മറുകള്‍,  വൈദ്യുത ലൈനുകള്‍ തുടങ്ങിയവ പൂര്‍വസ്ഥിതിയിലാക്കുന്നതുമുള്‍പ്പെടെ ജോലികള്‍ അടിയന്തിരമായി പുരോഗമിക്കുകയാണെന്നും കെഎസ്ഇബി അധികൃതര്‍ അറിയിച്ചു.