അബുദാബി,  കുവൈറ്റ്,  ദുബായ്,  മസ്കറ്റ്, ദോഹ എന്നിവിടങ്ങളിൽ നിന്നും  നെടുമ്പാശ്ശേരി, കരിപ്പൂർ, കണ്ണൂർ  അന്താരാഷ്ട്ര വിമാനത്താവളങ്ങളിൽ  ഇന്നലെ (ജൂൺ 4) ജില്ലയിലെത്തിയത് 53 പാലക്കാട് സ്വദേശികൾ.  ഇവരിൽ 19 പേർ  ഇൻസ്റ്റിറ്റ്യൂഷനൽ ക്വാറന്റൈനിൽ പ്രവേശിച്ചു.  ബാക്കിയുള്ള 34 പേർ വീടുകളിൽ നിരീക്ഷണത്തിലാണ്. 

 ദുബായിൽ നിന്നും നെടുമ്പാശ്ശേരി അന്താരാഷ്ട്ര വിമാനത്താവളത്തിൽ 17 പാലക്കാട് സ്വദേശികളാണ് തിരിച്ചെത്തിയത്. ഇവരിൽ 8 പേർ  ഇൻസ്റ്റിറ്റ്യൂഷനൽ ക്വാറന്റൈനിൽ  പ്രവേശിച്ചു. 9 പേർ വീട്ടിൽ നിരീക്ഷണത്തിലാണ്.

 ഇതര സംസ്ഥാനങ്ങളിൽ  നിന്ന് വാളയാർ ചെക്പോസ്റ്റ് വഴി ഇന്നലെ   ( ജൂൺ നാലിന് രാവിലെ 6 മുതൽ ജൂൺ അഞ്ചിന് രാവിലെ 6 വരെ) 1814 പേർ  കേരളത്തിൽ എത്തിയതായി സ്പെഷ്യൽ ബ്രാഞ്ച് ഡി.വൈ.എസ്.പി ആർ. മനോജ് കുമാർ അറിയിച്ചു. 1091 പുരുഷൻമാരും 479 സ്ത്രീകളും 244
കുട്ടികളുമുൾപ്പെടെയുള്ളവർ 562 വാഹനങ്ങളിലായാണ് കേരളത്തിലേക്ക് എത്തിയത്. 403 കാറുകൾ, 62 ഇരുചക്രവാഹനങ്ങൾ,11 ട്രാവലറുകൾ,72 മിനി ബസുകൾ, ഒൻപത് ആംബുലൻസുകൾ, അഞ്ച് ഓട്ടോറിക്ഷകൾ എന്നിവയാണ് അതിർത്തി കടന്ന് കേരളത്തിലെത്തിയത്.
 

അറ്റകുറ്റപ്പണി നടക്കുന്നതിനാല്‍ ചുണ്ടമ്പറ്റ മുതല്‍ കട്ടുപ്പാറ വരെയുള്ള റോഡില്‍ ജൂണ്‍ 8 മുതല്‍ 15 ദിവസത്തേക്ക് താല്‍ക്കാലികമായി ഗതാഗതം നിരോധിച്ചതായി അസിസ്റ്റന്റ് എക്‌സിക്യൂട്ടീവ് എന്‍ജിനീയര്‍ അറിയിച്ചു. ചുണ്ടമ്പറ്റ വഴി വിളയൂരിലേക്ക് വാഹനങ്ങള്‍ തിരിച്ചു വിടുന്നതായിരിക്കും.

പാലക്കാട് വിദ്യാഭ്യാസ ജില്ലയിലെ പരീക്ഷാ സെന്ററുകളില്‍ 2019 നവംബറിലും  മുന്‍ വര്‍ഷങ്ങളിലും നടന്ന കെ - ടെറ്റ് പരീക്ഷകള്‍ വിജയിച്ച് സര്‍ട്ടിഫിക്കറ്റ് പരിശോധന പൂര്‍ത്തിയാക്കിവര്‍ക്ക് സര്‍ട്ടിഫിക്കറ്റുകള്‍ ജൂണ്‍ എട്ടിന് രാവിലെ 10 മുതല്‍ ജില്ലാ വിദ്യാഭ്യാസ ഓഫീസില്‍ വിതരണം ചെയ്യും. അര്‍ഹരായവര്‍ ഹാള്‍ടിക്കറ്റ് സഹിതം ഹാജരാകണമെന്ന് പാലക്കാട് ജില്ലാ വിദ്യാഭ്യാസ ഓഫീസര്‍ അറിയിച്ചു.

നെഹ്രു യുവകേന്ദ്രയുടെ ആഭ്യമുഖ്യത്തില്‍ ജില്ലയിലുടനീളം വിവിധ യൂത്ത് ക്ലബുകളുടെ നേതൃത്വത്തില്‍ റോഡരികിലും പൊതുസ്ഥലങ്ങളിലും വൃക്ഷ തൈകള്‍ വെച്ചുപിടിപ്പിക്കുന്ന പ്രവര്‍ത്തനത്തിന് തുടക്കമായി. പാലക്കാട് ജില്ലാ പഞ്ചായത്ത് റോഡില്‍ നേരത്തെ നട്ട മരങ്ങളുടെ പരിപാലനവും പുതിയ തൈകള്‍ വെച്ച് പിടിപ്പിക്കലും നടന്നു. ചെമ്പകം, ഇലഞ്ഞി, മഹാഗണി, ഉങ്ങു, കണിക്കൊന്ന എന്നീ  മരങ്ങളാണ് നട്ടത്. പരിസ്ഥിതി ദിനാഘോഷം നെഹ്രു യുവകേന്ദ്ര ജില്ല യൂത്ത് കോഡിനേറ്റര്‍ എം.അനില്‍കുമാര്‍ ഉദ്ഘാടനം ചെയ്തു. എസ്.ശിവദാസ്, കെ.വിനോദ് കുമാര്‍, എന്‍.കര്‍പ്പകം, നാഷണല്‍ യൂത്ത് വളണ്ടിയര്‍മാര്‍ നേതൃത്വം നല്‍കി.

ജില്ലയിലെ മഴക്കാലപൂര്‍വ പ്രവര്‍ത്തങ്ങള്‍ വിലയിരുത്തുന്നതിനും  മഴക്കാലത്തോടനുബന്ധിച്ച് അടിയന്തിരമായി പൂര്‍ത്തിയാക്കേണ്ട പ്രവര്‍ത്തനങ്ങള്‍ സംബന്ധിച്ച് ചര്‍ച്ചചെയ്യാനുമായി മന്ത്രി എ.കെ. ബാലന്റെ  നേതൃത്വത്തില്‍ കലക്ട്രേറ്റ്  കോണ്‍ഫറന്‍സ് ഹാളില്‍ യോഗം ചേര്‍ന്നു.

ഭാരതീയ ചികിത്സാ വകുപ്പ് സംഘടിപ്പിച്ച പരിസ്ഥിതി ദിനാചരണത്തിന്റെ ജില്ലാതല ഉദ്ഘാടനം ജില്ലാ മെഡിക്കല്‍ ഓഫീസര്‍ (ആയുര്‍വ്വേദം) ഡോ. എസ്. ഷിബു വൃക്ഷത്തൈ നട്ട് നിര്‍വഹിച്ചു. ജില്ലാ ആയുര്‍വ്വേദ ആശുപത്രിയില്‍ നടന്ന ചടങ്ങില്‍ ചീഫ് മെഡിക്കല്‍ ഓഫീസര്‍ ഡോ. എ. ആരിഫ പരിസ്ഥിതി ദിനത്തോടനുബന്ധിച്ചുള്ള പ്രതിജ്ഞ ചൊല്ലിക്കൊടുത്തു. സീനിയര്‍ സൂപ്രണ്ട് കെ.പി. രാജേന്ദ്രന്‍, സീനിയര്‍ മെഡിക്കല്‍ ഓഫീസര്‍ ഡോ. ഗീതാറാണി എന്നിവര്‍ സംസാരിച്ചു. ആശുപത്രിയില്‍ എത്തിയ 500 ലധികം രോഗികള്‍ക്ക് ഔഷധത്തൈകള്‍ വിതരണം ചെയ്തു.

പോത്തുണ്ടി ജലസേചന പദ്ധതിയുടെ ആയക്കെട്ട് പ്രദേശത്ത് കൃഷി ഉണക്കുഭീഷണി നേരിടുന്നതിനാല്‍ തുടര്‍ന്നും മഴ ലഭിക്കുന്നില്ലെങ്കില്‍ ഇന്നുമുതല്‍ (ജൂണ്‍ 6) പുഴയിലേയ്ക്കും ഇരുകനാലുകളിലേയ്ക്കും വെള്ളം നിയന്ത്രിത അളവില്‍ തുറന്നുവിടുന്നതാണെന്ന് എക്‌സിക്യൂട്ടീവ് എഞ്ചിനീയര്‍ അറിയിച്ചു. പുഴയുടെയും  ഇരു കനാലുകളുടെയും തീരത്തു താമസിക്കുന്നവര്‍ ജാഗ്രത പാലിക്കണം.