പട്ടിക ജാതി വികസന വകുപ്പിന്റെ കീഴില്‍ മണ്ണന്തല അംബേദ്കര്‍ ഭവനില്‍ പ്രവര്‍ത്തിക്കുന്ന ഇന്‍സ്റ്റിറ്റ്യൂട്ട് ഫോര്‍ സിവില്‍സര്‍വീസസ് എക്‌സാമിനേഷന്‍ ട്രെയിനിംഗ് സൊസൈറ്റിയില്‍ കരാര്‍ അടിസ്ഥാനത്തില്‍ ലൈബ്രേറിയനെ നിയമിക്കുന്നു.  ലൈബ്രറി സയന്‍സില്‍ ഡിപ്ലോമ, ബിരുദം/ബിരുദാനന്തര ബിരുദം ഉളളവര്‍ വയസ്/ജാതി/മുന്‍പരിചയം എന്നിവ തെളിയിക്കുന്ന രേഖകളുടെ അസല്‍ സഹിതം 15ന് രാവിലെ 11 മണിക്ക് വെളളയമ്പലം അയ്യങ്കാളി ഭവനിലെ പട്ടികജാതി വികസന വകുപ്പ് സീനിയര്‍ അഡ്മിനിസ്‌ട്രേറ്റീവ് ഓഫീസറുടെ ചേമ്പറില്‍ നേരിട്ടെത്തണം.  ഫോണ്‍: 0471 2533272.

 പി.എന്‍.എക്‌സ്.5288/17

 മോട്ടോര്‍ വാഹന വകുപ്പ് നടപ്പാക്കുന്ന ഒറ്റത്തവണ തീര്‍പ്പാക്കല്‍ പദ്ധതിയില്‍ 31നകം നികുതി കുടിശിക അടയ്ക്കാം. 2017 മാര്‍ച്ച് 31 ല്‍ അഞ്ച് വര്‍ഷമോ അതിലധികമോ നികുതി കുടിശികയുളള എല്ലാ വാഹന ഉടമകളും ഈ അവസരം പ്രയോജനപ്പെടുത്തണമെന്ന് ട്രാന്‍സ്‌പോര്‍ട്ട് കമ്മീഷണര്‍ അറിയിച്ചു.  നികുതി കുടിശിക അടയ്ക്കാത്ത വാഹനങ്ങള്‍ക്കെതിരെ റവന്യൂ റിക്കവറി നടപടികള്‍ സ്വീകരിക്കും.

 പി.എന്‍.എക്‌സ്.5287/17

സര്‍വ്വേ & ലാന്റ് റെക്കോര്‍ഡ്‌സ് വകുപ്പില്‍ സര്‍വ്വേയര്‍ ഗ്രേഡ് 2 തസ്തികയുടെ തെരഞ്ഞെടുപ്പിനായി നവംബര്‍ 7 ന് പ്രസിദ്ധീകരിച്ച സാധ്യതാ പട്ടികയിലുള്‍പ്പെട്ട മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലെ ഉദ്യോഗാര്‍ത്ഥികളുടെ ഒറ്റത്തവണ പരിശോധന കേരള പബ്ലിക് സര്‍വ്വീസ് കമ്മീഷന്‍ കോഴിക്കോട് മേഖലാ ഓഫീസില്‍  ഡിസംബര്‍ 15 മുതല്‍ 2018 ജനുവരി 3 വരെ രാവിലെ 10 മണി മുതല്‍ നടത്തും.                         ഉദ്യോഗാര്‍ത്ഥികള്‍ക്കുള്ള അറിയിപ്പ് പ്രൊഫൈല്‍ മെസ്സേജ്/ എസ്.എം.എസ് മുഖേന നല്‍കിയിട്ടുണ്ട്.

     സാന്ത്വന ചികിത്സാ   രംഗത്ത് സംസ്ഥാനത്തിന്റെ പ്രവര്‍ത്തനം ലോകശ്രദ്ധ പിടിച്ചു പറ്റുന്ന തരത്തില്‍ മികച്ച രീതിയിലാണെന്ന് മുഖ്യമന്ത്രി പിണറായി വിജയന്‍ അഭിപ്രായപ്പെട്ടു.  സാന്ത്വന ചികിത്സ ആവശ്യമുള്ള രോഗികള്‍ ആറില്‍ ഒരാള്‍ ഇന്ത്യയിലാണെങ്കിലും ഇന്ത്യയിലെ പാലിയേറ്റീവ് കെയര്‍ പ്രവര്‍ത്തന നിരക്ക് മൂന്ന് ശതമാനം മാത്രമാണ്. കേരളത്തിലാകട്ടെ ഇത് എണ്‍പത് ശതമാനത്തിലധികമാണ്.   ദേശീയ അന്തര്‍ദേശീയ തലത്തില്‍ രൂപീകരിച്ചിട്ടുള്ള ഒട്ടു മിക്ക പാലിയേറ്റീവ് കെയര്‍ സംരംഭങ്ങള്‍ക്കും നമ്മുടെ നാട് മാതൃകയാണെന്നത് അഭിമാനാര്‍ഹമാണെന്നും ഈ രംഗത്ത് സംസ്ഥാനത്തിന്റെ നേട്ടം ശ്രദ്ധേയമാണെന്നും അദ്ദേഹം അഭിപ്രായപ്പെട്ടു. 

കുടുംബശ്രീ സംരംഭ വികസനവുമായി ബന്ധപ്പെട്ട് മൈക്രോ എന്റര്‍പ്രൈസ് കണ്‍സള്‍ട്ടന്റ് തസ്തികയിലേക്ക് ഹോണറേറിയം വ്യവസ്ഥയില്‍ ജോലി ചെയ്യാന്‍ താത്പര്യമുള്ള 25-50 വയസ്സു വരെ പ്രായപരിധിയിലുള്ള വനിതകളെ ആവശ്യമുണ്ട്. യോഗ്യത ഏതെങ്കിലും വിഷയത്തില്‍ ബിരുദം. കുടുംബശ്രീ  എ ഡി എസ്സ് , സി ഡി എസ് സമിതികളില്‍ പ്രവൃത്തി പരിചയം ഉള്ളവര്‍ക്ക് വിദ്യാഭ്യാസ യോഗ്യതയില്‍ ഇളവ് ലഭിക്കും. ബയോഡാറ്റ, യോഗ്യത സര്‍ട്ടിഫിക്കറ്റിന്റെ കോപ്പി എന്നിവ സഹിതം  ജില്ലാ മിഷന്‍ ഓഫീസില്‍ നേരിട്ടോ, കുടുംബശ്രീ ജില്ലാമിഷന്‍ ഓഫീസ്, ആര്‍ പി കോംപ്ലക്‌സ്, നിയര്‍ അശോക ഹോസ്പിറ്റല്‍, തെക്കിബസാര്‍, കണ്ണൂര്‍-2 എന്ന വിലാസത്തിലോ ഡിസംബര്‍  20 നകം ലഭിക്കണം.

   കാര്‍ഷിക രംഗത്തിന്റെ മാറ്റത്തിന് വിവിധ മേഖലകളെ സംയോജിപ്പിച്ച് മുന്നോട്ടു പോകുവാന്‍ കഴിയണമെന്ന് പി.കരുണാകരന്‍ എംപി പറഞ്ഞു. ജില്ലയില്‍ തരിശായി കിടക്കുന്ന ആയിരക്കണക്കിന് ഏക്കര്‍ ഭൂമി കൃഷിക്ക് ഉപയോഗിക്കാന്‍ കഴിയണമെന്നും കീടനാശിനികള്‍ പൂര്‍ണ്ണമായും ഒഴിവാക്കിക്കൊണ്ടാകണം ഇത്തരം കൃഷിയെന്നും എം പി പറഞ്ഞു. ഹരിതകേരളം മിഷന്‍ രൂപീകരിച്ചതിന്റെ ഒന്നാം വാര്‍ഷികത്തോടനുബന്ധിച്ചുള്ള ജില്ലാതല പരിപാടി ബേഡഡുക്ക കുണ്ടംകുഴി   മാനസം  ഓഡിറ്റോറിയത്തില്‍ ഉദ്ഘാടനം ചെയ്യുകയായിരുന്നു അദ്ദേഹം.

കൊച്ചി: വിവേകാനന്ദന്‍ കേരളം സന്ദര്‍ശിച്ചതിന്റെ 125-ാം വാര്‍ഷികത്തോടനുബന്ധിച്ച് സാംസ്‌കാരിക വകുപ്പിന്റെ ആഭിമുഖ്യത്തില്‍ നടത്തുന്ന വിവേകാനന്ദ സ്പര്‍ശം പരിപാടി ഡിസംബര്‍ 15-ന് എറണാകുളം ദര്‍ബാര്‍ ഹാള്‍ ഗ്രൗണ്ടില്‍ നടക്കും.  വൈകിട്ട് ആറിന് ഡോ.കെ.ജി.പൗലോസ് പരിപാടിയുടെ ഉദ്ഘാടനം നിര്‍വഹിക്കും. കൊച്ചി മേയര്‍ സൗമിനി ജയിന്‍ മുഖ്യപ്രഭാഷണം നടത്തും. അക്കാദമി ചെയര്‍മാന്‍ നേമം പുഷ്പരാജ് ചടങ്ങില്‍ അദ്ധ്യക്ഷത വഹിക്കും. ഭാരത് ഭവന്‍ ഒരുക്കുന്ന രണ്ട് മണിക്കൂര്‍ ദൈര്‍ഘ്യമുളള ഭൃശ്യ-ശ്രാവ്യ വിരുന്ന് വൈകിട്ട് ഏഴിന് അരങ്ങേറും.

കേന്ദ്ര ഉപരിതല മന്ത്രാലയത്തിന്റെ നിര്‍ദ്ദേശപ്രകാരം വാഹനങ്ങളില്‍ അപകടത്തിന്റെ തീവ്രത ഉണ്ടാക്കുന്ന തരത്തില്‍ ഘടിപ്പിച്ചിരിക്കുന്ന ക്രാഷ് ഗാര്‍ഡുകള്‍, ബാറുകള്‍ ഇവയ്ക്ക് നിരോധനം ഏര്‍പ്പെടുത്തി.  പുതിയ ഇരുചക്ര വാഹനങ്ങളുടെ രജിസ്‌ട്രേഷന് ഹെല്‍മെറ്റ് റിയര്‍വ്യൂ മിറര്‍, സാരി ഗാര്‍ഡ്, ഹാന്‍ഡ് ഗ്രിപ്പ് ഇവ മതിയാവുന്നതാണ്.  ഇവ പൂര്‍ണമായും സൗജന്യമായി ലഭിക്കുന്നതുമാണ്.  മറ്റുള്ളവ പിടിപ്പിക്കുന്നത് പിഴ ഈടാക്കാവുന്ന കുറ്റമായി പരിഗണിക്കും.  നാലുചക്രവാഹനങ്ങളിലും ക്രാഷ്ഗാര്‍ഡുകള്‍, ലൈറ്റുകള്‍ മുതലായവ പിടിപ്പിക്കുന്നതും വിലക്കിയിട്ടുണ്ട്.

രജിസ്‌ട്രേഷന്‍ വകുപ്പ് ഈ മാസം  23 ന് നടത്തുന്ന ആധാരമെഴുത്ത് ലൈസന്‍സിനുളള പരീക്ഷയ്ക്കായി സബ് രജിസ്ട്രാര്‍  ഓഫീസുകളില്‍ നിന്നും ലഭിച്ച ഹാള്‍ടിക്കറ്റുകളില്‍ എറണാകുളം ജില്ലയില്‍ രജിസ്റ്റര്‍ നമ്പര്‍ 3341 മുതല്‍ 3627 വരെയുളള അപേക്ഷകരുടെ  പരീക്ഷാസെന്റര്‍ തൃപ്പൂണിത്തുറ ഗവ. ഗേള്‍സ് എച്ച് എസ് എന്നാണ് ഹാള്‍ടിക്കറ്റില്‍ രേഖപ്പെടുത്തിയിട്ടുളളത്.  അത് തൃപ്പൂണിത്തുറ ഗവ. ഗേള്‍സ് ഹയര്‍സെക്കന്ററി സ്‌കൂള്‍ എന്ന്  തിരുത്തി വായിക്കണമെന്ന് കാസര്‍കോട് ജില്ലാ രജിസ്ട്രാര്‍ അറിയിച്ചു.