ചെക്ക്‌പോസ്റ്റ്കളുടെ പ്രവര്‍ത്തനം നവീകരിക്കുന്നതിന്റേയും വാഹന പരിശോധന കാര്യക്ഷമമാക്കുന്നതിന്റേയും ഭാഗമായി എക്‌സൈസ് ചെക്ക്‌പോസ്റ്റുകള്‍ക്കായി വാങ്ങിയ 20 മോട്ടോര്‍ ബൈക്കുകള്‍ ഇന്ന് (ഡിസംബര്‍ 13) രാവിലെ 11 ന് എക്‌സൈസ് ഹെഡ്ക്വാര്‍ട്ടേഴ്‌സില്‍ എക്‌സൈസ് കമ്മീഷണര്‍ ഫ്‌ളാഗ് ഓഫ് ചെയ്യും.

ചെക്ക്‌പോസ്റ്റുകളില്‍ വാഹനപരിശോധന കൂടുതല്‍ കാര്യക്ഷമമാക്കുന്നതിനും ചെക്ക്‌പോസ്റ്റുകളിലെ പ്രവര്‍ത്തനം എക്‌സൈസ് കമ്മീഷണര്‍ ഉള്‍പ്പെടെയുള്ള മേല്‍ ഉദ്യോഗസ്ഥര്‍ക്ക് നിരീക്ഷിക്കുന്നതിനുമായി സി.സി.റ്റി.വി സംവിധാനം സ്ഥാപിക്കുന്ന നടപടി അന്തിമ ഘട്ടത്തിലാണെന്നും കമ്മീഷണര്‍ അറിയിച്ചു.

 പി.എന്‍.എക്‌സ്.5294/17

വൊക്കേഷണല്‍ ഹയര്‍ സെക്കന്ററി മാര്‍ച്ച് 2018 ല്‍ നടത്തുന്ന ഒന്നും രണ്ടും വര്‍ഷ പൊതുപരീക്ഷയുടെ തിയറി വിഷയങ്ങള്‍ മാര്‍ച്ച് ഏഴിനും വൊക്കേഷണല്‍ മൊഡ്യൂള്‍ പ്രായോഗിക പരീക്ഷകളും നോണ്‍ വൊക്കേഷണല്‍ വിഷയങ്ങളുടെ പ്രായോഗിക പരീക്ഷകളും ഫെബ്രുവരി 12 നും ആരംഭിക്കും. ഒന്നും രണ്ടും വര്‍ഷ പരീക്ഷകള്‍ക്ക് പിഴ കൂടാതെ ഡിസംബര്‍ 21 വരെയും 20 രൂപ പിഴയോടെ ജനുവരി അഞ്ച് വരെയും '0202-01-102-93-VHSE Fees' എന്ന ശീര്‍ഷകത്തില്‍ ഫീസടയ്ക്കാം. അപേക്ഷാ ഫാറവും പരീക്ഷയെ സംബന്ധിച്ച വിവരങ്ങളും പരീക്ഷാ കേന്ദ്രങ്ങളില്‍ നിന്നും ലഭിക്കും.

തിരുവനന്തപുരം ഗവണ്‍മെന്റ് ലോ കോളേജിലെ പി.ടി.എ പൊതുയോഗം ഇന്ന് (ഡിസംബര്‍ 13) ഉച്ചയ്ക്ക് രണ്ടിന് കോളേജില്‍ നടക്കുമെന്ന് പ്രിന്‍സിപ്പല്‍ അറിയിച്ചു.

 പി.എന്‍.എക്‌സ്.5292/17

   ഹരിതകേരളം മിഷന്‍ രൂപീകരിച്ചതിന്റെ ഒന്നാം വാര്‍ഷികത്തോടനുബന്ധിച്ചുള്ള ജില്ലാതല പരിപാടിയുടെ ഭാഗമായി ജില്ലാ ഇന്‍ഫര്‍മേഷന്‍ ഓഫീസിന്റെ ആഭിമുഖ്യത്തില്‍ ഹരിതകേരളം ഫോട്ടോപ്രദര്‍ശനം നടത്തി. കഴിഞ്ഞ ഒരു വര്‍ഷം  നടത്തിയ പ്രവര്‍ത്തനങ്ങളുടെ ഫോട്ടോകളാണ് പ്രദര്‍ശിപ്പിച്ചത്.  ബേഡഡുക്ക കുണ്ടംകുഴി   മാനസം  ഓഡിറ്റോറിയത്തില്‍ നടന്ന ഫോട്ടോപ്രദര്‍ശനം ജില്ലാ പഞ്ചായത്ത് പ്രസിഡന്റ്  എ ജി സി ബഷീര്‍ നിര്‍വഹിച്ചു. പി കരുണാകരന്‍ എം പി മറ്റു ജനപ്രതിനിധികള്‍ സംബന്ധിച്ചു.

സ്ത്രീകളുടെയും വികലാംഗരുടെയും ക്ഷേമം സംബന്ധിച്ച നിയമസഭാ സമിതി ഡിസംബര്‍ 20ന് രാവിലെ 10.30ന് പാലക്കാട് കളക്ടറേറ്റ് കോണ്‍ഫറന്‍സ് ഹാളില്‍ യോഗം ചേരും.  ജില്ലയില്‍ നിന്നും സമിതിക്ക് ലഭിച്ച വിവിധ പരാതികളില്‍ റിപ്പോര്‍ട്ട് ലഭ്യമാകാത്തതുമായി ബന്ധപ്പെട്ട് ജില്ലാതല ഉദ്യോഗസ്ഥരില്‍ നിന്നും പരാതിക്കാരില്‍ നിന്നും തെളിവെടുക്കും.  സമിതിയുടെ അധികാര പരിധിയില്‍ വരുന്ന വിഷയങ്ങളില്‍ വിവിധ സംഘടനകള്‍, പൊതുജനങ്ങള്‍ എന്നിവരില്‍ നിന്നും പരാതികള്‍ സ്വീകരിക്കും.  സമിതി മുമ്പാകെ പരാതി സമര്‍പ്പിക്കാനുളള വ്യക്തികള്‍, സംഘടനാ പ്രതിസനിധികള്‍ എന്നിവര്‍ യോഗത്തിനെത്തി സമിതി അധ്യക്ഷയ്ക്ക് പരാതി രേഖാമൂലം നല്‍കണം.  ജില്ലയിലെ സര്

2017 -18 അധ്യയന വര്‍ഷത്തേക്ക് തിരുവനന്തപുരം സര്‍ക്കാര്‍ സംസ്‌കൃത കോളേജിലെ ഇംഗ്ലീഷ് വിഭാഗത്തില്‍ ഗസ്റ്റ് ലക്ചററുടെ ഒരു ഒഴിവിലേക്ക് 15ന് രാവിലെ  11ന് പ്രിന്‍സിപ്പാളിന്റെ ഓഫീസില്‍ ഇന്റര്‍വ്യൂ നടക്കും.  കോളേജ് വിദ്യാഭ്യാസ വകുപ്പിന്റെ കൊല്ലം മേഖലാ ഓഫീസില്‍  ഗസ്റ്റ് അധ്യാപകരുടെ പേര് രജിസ്റ്റര്‍ ചെയ്തിട്ടുളളവര്‍ യോഗ്യത, ജനനതീയതി, മുന്‍പരിചയം  എന്നിവ തെളിയിക്കുന്നതിനുളള അസല്‍ സര്‍ട്ടിഫിക്കറ്റുകള്‍ സഹിതം അഭിമുഖത്തിനെത്തണം.

 പി.എന്‍.എക്‌സ്.5290/17

സംസ്ഥാന ആസൂത്രണ ബോര്‍ഡില്‍ ഒരു ടെക്‌നിക്കല്‍ കണ്‍സള്‍ട്ടന്റിനെ കരാര്‍ വ്യവസ്ഥയില്‍ പ്രതിമാസം 25000 രൂപാ നിരക്കില്‍ നിയമിക്കുന്നു. ആസൂത്രണ ബോര്‍ഡിന്റെ പട്ടത്തുള്ള കാര്യാലയത്തില്‍ 27 ന് രാവിലെ 10.30 ന് അഭിമുഖം നടക്കും. അഭിമുഖത്തിനെത്തുന്നവര്‍ അസല്‍ സര്‍ട്ടിഫിക്കറ്റുകള്‍ ഹാജരാക്കണം. ബി.ഇ/ബി.ടെക് കമ്പ്യൂട്ടര്‍ സയന്‍സ്/കമ്പ്യൂട്ടര്‍ ആപ്ലിക്കേഷന്‍ ആണ് യോഗ്യത.  സര്‍ക്കാര്‍ സര്‍വ്വീസിലോ  മറ്റേതെങ്കിലും സര്‍ക്കാര്‍ അംഗീകൃത സ്ഥാപനത്തിലോ ഹാര്‍ഡ്‌വെയര്‍/നെറ്റ് വര്‍ക്കിംഗ് സോഫ്റ്റ്‌വെയര്‍ ആപ്ലിക്കേഷനില്‍ മൂന്ന് വര്‍ഷമോ അതില്‍ കൂടുതലോ പ്രവൃത്തി പരിചയം ഉണ്ടാവണം.