നാഷണല്‍ ഇന്‍സ്റ്റിറ്റ്യൂട്ട് ഓഫ് സ്പീച്ച് ആന്റ് ഹിയറിങ്ങും സാമൂഹ്യനീതി വകുപ്പും സംയുക്തമായി ഓഗസ്റ്റ് 14 ന് രാവിലെ 10.30 ന് വെബ്ബനാര്‍ സംഘടിപ്പിക്കുന്നു. മുച്ചുണ്ടും മുറി അണ്ണാക്കും പ്രാരംഭത്തില്‍ തന്നെ ശസ്ത്രക്രീയ നടത്തേണ്ടതിന്റെ ആവശ്യകത എന്ന വിഷയത്തില്‍ നടക്കുന്ന വെബ്ബിനാറിന്റെ ലിങ്ക് ലഭിക്കുന്നതിനും മറ്റു വിവരങ്ങള്‍ക്കും http://nidas.nish.ac.in/be-a-participant/ ല്‍ രജിസ്റ്റര്‍ ചെയ്യണമെന്ന് ജില്ലാ ശിശു സംരക്ഷണ ഓഫീസര്‍ അറിയിച്ചു.

മഴക്കെടുതിയില്‍ മഞ്ചേശ്വരം താലൂക്കില്‍  ഇത് വരെ ഏഴ് വീടുകള്‍ പൂര്‍ണമായും പതിനഞ്ച് വീട് ഭാഗികമായും തകര്‍ന്നു. 22 കുടുംബങ്ങളില്‍ നിന്നായി 99 പേര്‍ വീട് മാറിത്താമസിച്ചു. നിലവില്‍ ക്യാമ്പുകളൊന്നുമില്ല. ഉപ്പള മുസോടി കടപ്പുറത്ത് ഒരു റോഡ് കടല്‍ക്ഷോഭത്തില്‍ തകര്‍ന്നു. കഴിഞ്ഞ ജൂണില്‍ പുത്തിഗെ പഞ്ചായത്തിലെ എടനാട് വില്ലേജില്‍ 24 വയസുകാരന്‍ മണ്ണിടിഞ്ഞ് വീണ് മരിച്ചിരുന്നു.  

 ചെമ്മനാട് വില്ലേജിലെ ആഗസ്റ്റ് 11ന്  പുലര്‍ച്ചെ നാലിന് ഉണ്ടായ ശക്തമായ മഴയില്‍ വീട് ഭാഗികമായി തകര്‍ന്നു.15,000 രൂപയുടെ നാശനഷ്ടം കണക്കാക്കി.

കേരള കെട്ടിട നിര്‍മ്മാണത്തൊഴിലാളി ക്ഷേമനിധി ബോര്‍ഡിലെ പെന്‍ഷന്‍ മസ്റ്ററിംഗ് ചെയ്യാത്ത ഗുണഭോക്താക്കള്‍ ഓഗസ്റ്റ് 16 നകം പ്രാദേശിക അക്ഷയ കേന്ദ്രങ്ങള്‍ മുഖേന മസ്റ്ററിംഗ് നടത്തണമെന്ന് ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു. അക്ഷയ കേന്ദ്രങ്ങള്‍ മുഖേന മസ്റ്ററിംഗ് നടത്തി പരാജയപ്പെട്ടവര്‍ അക്ഷയയില്‍ നിന്നുളള രസീതും, ലൈഫ്‌സര്‍ട്ടിഫിക്കറ്റും ജില്ലാ കാര്യാലയത്തില്‍ ഹാജരാക്കണം.

സംസ്ഥാന വനിതാ ശിശുവികസന വകുപ്പിന് കീഴില്‍ കാസര്‍കോട് പരവനടുക്കത്തുള്ള ഗവണ്‍മെന്റ് ചില്‍ഡ്രന്‍സ് ഹോമിലേക്ക് ഒരു വര്‍ഷ കരാര്‍ അടിസ്ഥാനത്തില്‍ എഡ്യൂകേറ്റായിട്ട് ജോലി ചെയ്യാന്‍ താത്പര്യമുളള ഉദ്യോഗാര്‍ത്ഥികളില്‍ നിന്നും ഓണ്‍ലൈന്‍ വഴി അപേക്ഷ ക്ഷണിച്ചു.ഒരൊഴിവുള്ള തസ്തികയിലേക്ക് ഗവണ്‍മെന്റ് ചില്‍ഡ്രന്‍സ് ഹോമിന് സമീപത്തുള്ള ഉദ്യോഗാര്‍ത്ഥികള്‍ക്ക് അപേക്ഷിക്കാം.

ജില്ലാ കലക്ടറുടെ നേതൃത്വത്തില്‍ ഒറ്റപ്പാലം താലൂക്കിലെ പരാതി പരിഹാര അദാലത്ത് കോവിഡ് - 19 ന്റെ പശ്ചാത്തലത്തില്‍ വീഡിയോ കോണ്‍ഫറന്‍സായി ഓഗസ്റ്റ് 17 ന്  രാവിലെ 11 ന് നടക്കും. ഓഗസ്റ്റ് 13 ന് വൈകിട്ട് അഞ്ച് വരെ എല്ലാ അക്ഷയ കേന്ദ്രങ്ങള്‍ വഴി അപേക്ഷ സ്വീകരിക്കും. അപേക്ഷകര്‍ പ്രസ്തുത ദിവസം ബന്ധപ്പെട്ട അക്ഷയ കേന്ദ്രത്തിലെത്തി വീഡിയോ കോണ്‍ഫറന്‍സ് മുഖേന അദാലത്തില്‍ ശാരീരിക അകലം പാലിച്ച് പങ്കെടുക്കണം.

വിജിലന്‍സ് വകുപ്പിലെ കാസര്‍കോട് യൂണിറ്റ് ഓഫീസിനനുവദിച്ച മഹീന്ദ്ര ടി.യു.വി വാഹനത്തിന് ടയറുകള്‍ (2 എണ്ണം) വാങ്ങുന്നതിനായി ക്വട്ടേഷന്‍ ക്ഷണിച്ചു.  ക്വട്ടേഷന്‍ ഓഗസ്റ്റ്  17 വരെ സ്വീകരിക്കും .  ഫോണ്‍- 04994 255889. 

പട്ടികജാതി വികസന വകുപ്പിന്റെ  പഠനമുറി ധനസഹായ പദ്ധതിയിലേക്ക്  നീലേശ്വരം ബ്ലോക്ക്, നഗരസഭ പിരിധിയില്‍ താമസിക്കുന്ന പട്ടികജാതി വിഭാഗത്തില്‍പ്പെട്ട വിദ്യാര്‍ത്ഥികളുടെ രക്ഷിതാക്കളില്‍ നിന്നും അപേക്ഷ ക്ഷണിച്ചു. എട്ട് മുതല്‍ പ്ലസ്ടു വരെയുള്ള ക്ലാസ്സുകളില്‍ പഠിക്കുന്ന വിദ്യാര്‍ത്ഥികള്‍ക്ക് അപേക്ഷിക്കാം. 800 സ്‌ക്വയര്‍ഫീറ്റില്‍ താഴെ വിസ്തീര്‍ണ്ണമുളള വീടുളളവര്‍ക്കും, വരുമാനപരിധി ഒരുലക്ഷം രൂപവരെയുളളവര്‍ക്കുമാണ്  അപേക്ഷിക്കാന്‍ അവസരം. അപേക്ഷകള്‍ ആഗസ്റ്റ് 25 നകം  നീലേശ്വരം ബ്ലോക്ക് പട്ടികജാതി വികസന ഓഫീസില്‍ ലഭിക്കണം.

പട്ടാമ്പിയിലെ ചില മേഖലകള്‍ കണ്ടെയ്ന്‍മെന്റ് സോണുകളായി പ്രഖ്യാപിച്ചത്  ശാസ്ത്രീയ സമീപനത്തിന്റെ അടിസ്ഥാനത്തിലാണെന്നും ക്ലസ്റ്റര്‍ നിയന്ത്രണങ്ങളില്‍ നിന്ന് പുറത്തു കടക്കാന്‍ ശ്രമിക്കുന്നത്  അപകടകരമാണെന്നും പട്ടികജാതി പട്ടികവര്‍ഗ പിന്നാക്ക ക്ഷേമ നിയമ സാംസ്‌ക്കാരിക പാര്‍ലമെന്ററി കാര്യ വകുപ്പ് മന്ത്രി എ.കെ ബാലന്‍ പറഞ്ഞു. കോവിഡ്-19 പ്രതിരോധവുമായി ബന്ധപ്പെട്ട് അവലോകന യോഗത്തിന് ശേഷം കലക്ടറേറ്റ് കോണ്‍ഫറന്‍സ് ഹാളില്‍ നടന്ന പത്രസമ്മേളനത്തില്‍ സംസാരിക്കുകയായിരുന്നു മന്ത്രി.