വിവിധ കാരണങ്ങളാൽ കയർ ക്ഷേമനിധി വിഹിതം കുടിശ്ശികയായവരിൽ നിന്നും കുടിശ്ശികയും കാലയളവും പരിഗണിക്കാതെ വിഹിതം ഒറ്റ തവണയായി സ്വീകരിക്കുന്നതിനുള്ള സമയ പരിധി ജൂൺ 30 വരെ നീട്ടി. 60 വയസ്സ് പൂർത്തികരിക്കാത്ത തൊഴിലാളികൾ ഈ അവസരം പ്രയോജനപ്പെടുത്തിയാൽ മറ്റ് പെൻഷനുകൾ ഇല്ലെങ്കിൽ കുടിശ്ശിക തീർക്കുന്ന മുറയ്ക്ക് ലോക്ക് ഡൗൺ ധനസഹായമായി 1000 രൂപ ലഭിക്കുന്നതാണെന്ന് റീജിയണൽ ഓഫീസർ അറിയിച്ചു. ഫോൺ : 0484 2441945.
 

ചരക്കുസേവന നികുതി വകുപ്പിന്റെ ഡെപ്യൂട്ടി കമ്മീഷണറുടെ (ഇന്റലിജൻസ്) കാര്യാലയത്തിൽ ജൂൺ 16 ന് നടത്താനിരുന്ന താൽക്കാലിക ഡ്രൈവർ തസ്തികയുടെ അഭിമുഖം മാറ്റി വച്ചു. ഫോൺ: 0487 2380695.

കോവിഡ് 19 വ്യാപനത്തിന്റെ പശ്ചാത്തലത്തിൽ ഭക്ഷ്യ സുരക്ഷ ഉറപ്പുവരുത്താൻ സംസ്ഥാന സർക്കാർ ആസൂത്രണം ചെയ്ത സുഭിക്ഷ കേരളം പദ്ധതിയ്ക്കായി ഒരുങ്ങി പഴയന്നൂർ ബ്ലോക്ക് പഞ്ചായത്ത്. കാർഷിക, മത്സ്യ, ക്ഷീര, മുട്ട, മാംസം ഉത്പാദനം പരിപോഷിപ്പിക്കുന്നതിനാണ് പദ്ധതി ലക്ഷ്യമിടുന്നത്. തരിശ് ഭൂമി കൃഷിയോഗ്യമാക്കാൻ 2 കോടി 50 ലക്ഷം, ക്ഷീര വികസനത്തിന് 2 കോടി 75 ലക്ഷം, മത്സ്യ കൃഷിക്ക് കുളങ്ങൾ നിർമ്മിക്കാൻ 8 കോടി 75 ലക്ഷം രൂപയും അടക്കം 25 കോടിയുടെ പദ്ധതികളാണ് ആസൂത്രണം ചെയ്തിരിക്കുന്നതെന്ന് പഞ്ചായത്ത് പ്രസിഡന്റ് തങ്കമ്മ, വൈസ് പ്രസിഡന്റ് എം പദ്മകുമാർ എന്നിവർ അറിയിച്ചു.
 

കോവിഡ് പ്രതിരോധത്തിന് ആയുർവേദത്തിന്റെ ഉറപ്പുമായി അമൃതം പദ്ധതി ജില്ലയിൽ ശ്രദ്ധേയമാകുന്നു .സംസ്ഥാന കോവിഡ് റെസ്പോൺസ് സെൽ കോവിഡ് പ്രതിരോധത്തിന്റെ ഭാഗമായി ഭാരതീയ ചികിത്സാ വകുപ്പും നാഷണൽ ആയുഷ് മിഷനുമായി സഹകരിച്ചു നടപ്പാക്കിയതാണ് അമൃതം പദ്ധതി .

വെള്ളിയാങ്കല്ല് ഭാരതപ്പുഴ റെഗുലേറ്ററുകളിൽ അടിഞ്ഞ് കൂടിയ മണൽ നീക്കം ചെയ്യലുമായി ബന്ധപ്പെട്ട തുടർ നടപടികൾക്ക് തീരുമാനമായി. ഇതു സംബന്ധിച്ച് കളക്ടറുടെ നേതൃത്വത്തിൽ ചേംബറിൽ ചേർന്ന യോഗത്തിൽ റെഗുലേറ്ററുകളുടെ പ്രവർത്തനത്തെ ബാധിക്കും വിധം അടിഞ്ഞ് കൂടിയ മണൽ നീക്കം ചെയ്യാൻ വേണ്ട നിർദ്ദേശങ്ങൾ വകുപ്പ് ഉദ്യോഗസ്ഥർക്ക് നൽകി. റഗുലേറ്ററിൽ നിന്ന് എടുക്കുന്ന മണൽ യാർഡുകളിലേക്ക് മാറ്റും. എക്സിക്യൂട്ടീവ് എഞ്ചനീയർക്കായിരിക്കും മേൽനോട്ട ചുമതല.

ജില്ലയിൽ വിദ്യാർത്ഥികൾക്ക് ഓൺലൈൻ പഠന സൗകര്യം ഒരുക്കുന്നതിന്റെ ഭാഗമായി അങ്കണവാടി, വായനശാല തുടങ്ങിയ പൊതു കേന്ദ്രങ്ങളിലേക്ക് ഓരോ അധ്യാപകരെ ചുമതലപ്പെടുത്തുന്നതിന് തീരുമാനമായി. ജില്ലാ കളക്ടർ എസ് ഷാനവാസിന്റെ നേതൃത്വത്തിൽ പൊതുവിദ്യാഭ്യാസ വകുപ്പ് ഉദ്യോഗസ്ഥരുമായി കളക്ട്രേറ്റ് ചേംബറിൽ ചേർന്ന യോഗത്തിലാണ് തീരുമാനം.