കേരള കാര്‍ഷിക സര്‍വകലാശാല 2025 അധ്യയന വര്‍ഷത്തെ ബിരുദദാന ചടങ്ങ് നടത്തി. കേരള ഗവര്‍ണറും കാര്‍ഷിക സര്‍വകലാശാലാ ചാന്‍സിലറുമായ രാജേന്ദ്ര വിശ്വനാഥ് ആര്‍ലേക്കര്‍ മുഖ്യാതിഥിയായി പങ്കെടുത്ത് ബിരുദ ദാനം നിര്‍വ്വഹിച്ചു. ബിരുദം നേടി പുറത്തിറങ്ങുന്ന വിദ്യാര്‍ത്ഥികള്‍ക്ക് നമ്മുടെ നാടിനുവേണ്ടി ഉത്തരവാദിത്തത്തോടെ ധാരാളം കാര്യങ്ങള്‍ ചെയ്യാനുണ്ടെന്ന് ചാന്‍സലര്‍ ഓര്‍മിപ്പിച്ചു.  കാര്‍ഷിക ബിരുദധാരികള്‍ രാജ്യത്തിന്റെ ഭക്ഷ്യ സുരക്ഷയ്ക്കുവേണ്ടി പ്രവര്‍ത്തിക്കാന്‍ അദ്ദേഹം ആഹ്വാനം ചെയ്തു.

നിയമസഭാ തിരഞ്ഞെടുപ്പ് നിരീക്ഷിക്കുന്നതിനും വിലയിരുത്തുന്നതിനുമായി വിവിധ വിദേശ രാജ്യങ്ങളിൽ നിന്നുള്ള  8 അംഗ  സംഘം ഇന്ന് (ഏപ്രിൽ 8) ജില്ലയിലെത്തും. ഇന്റർനാഷണൽ ഇലക്ഷൻ വിസിറ്റേഴ്‌സ് പ്രോഗ്രാമിന്റെ (IEVP) ഭാഗമായിട്ടാണ് വിവിധ രാജ്യങ്ങളിലെ തിരഞ്ഞെടുപ്പ് മാനേജ്‌മെന്റ് ബോഡികളിൽ നിന്നുള്ള പ്രതിനിധികൾ തലസ്ഥാനത്ത് എത്തുന്നത്.

2026-ലെ നിയമസഭാ തിരഞ്ഞെടുപ്പ് പൂര്‍ണമായും ഹരിത പ്രോട്ടോക്കോള്‍ പാലിച്ചു നടത്തുന്നതിന്റെ ഭാഗമായി ജില്ലാഭരണകൂടത്തിന്റെയും ശുചിത്വമിഷന്റെയും നേതൃത്വത്തില്‍ ഹരിത വോട്ട് വണ്ടി  ജില്ലാ കലക്ടര്‍ എസ്.പ്രേം കൃഷ്ണന്‍ കലക്ടറേറ്റില്‍  ഫ്‌ളാഗ് ഓഫ് ചെയ്തു. ജില്ലയിലെ 5 നിയോജക മണ്ഡലങ്ങളില്‍ പര്യടനം നടത്തി ഹരിത തിരഞ്ഞെടുപ്പിന്റെ സന്ദേശം പൊതുജനങ്ങളില്‍ എത്തിക്കുക, പോളിംഗ്ബൂത്തുകളിലും പരിസരങ്ങളിലും മാലിന്യംകുറയ്ക്കുക തുടങ്ങിയവയാണ്. വോട്ടവകാശം വിനിയോഗിക്കുന്നതിനൊപ്പം തന്നെ പരിസ്ഥിതിയെ സംരക്ഷിക്കേണ്ടതിന്റെ ആവശ്യകതയും പൊതുജനങ്ങളിലേക്ക് എത്തിക്കുകയാണ് വോട്ട് വണ്ടിയുടെ പ്രധാന ലക്ഷ്യം.

വോട്ടർമാർക്കും ഏജൻ്റുമാർക്കും പോളിംഗ് ബൂത്തിനുള്ളിൽ മൊബൈൽ ഫോൺ കൊണ്ടുപോകാൻ അനുവാദമില്ല.

ദേശീയ ദുരന്ത നിവാരണ അതോറിറ്റി, സംസ്ഥാന ദുരന്ത നിവാരണ അതോറിറ്റി എന്നിവയുടെ ആഭിമുഖ്യത്തില്‍ പ്രകൃതി ദുരന്തങ്ങളിലും മറ്റ് അടിയന്തര സാഹചര്യങ്ങളിലും പ്രവര്‍ത്തിക്കുന്നതിന് സിവില്‍ ഡിഫന്‍സ് ടീമിനെ തയാറാക്കുന്നു. ഏപ്രില്‍ 20 മുതല്‍ 27 വരെ ഏഴ് ദിവസത്തെ ദുരന്ത നിവാരണ പ്രതികരണ പരിശീലനം നല്‍കുന്നു. 18 മുതല്‍ 40 വയസ് വരെയുള്ളവര്‍ക്ക് പങ്കെടുക്കാം. പങ്കെടുക്കുന്നവര്‍ക്ക് ദുരന്ത നിവാരണ കിറ്റ്, സര്‍ട്ടിഫിക്കറ്റ് എന്നിവ ലഭിക്കും. തിരഞ്ഞെടുക്കപ്പെടുന്ന യുവതീ യുവാക്കള്‍ക്ക് ഒരാഴ്ച നീളുന്ന സൗജന്യ പരിശീലനം നല്‍കും.

നിയമസഭാ തിരഞ്ഞെടുപ്പിന്റെ  അന്തിമഘട്ട ഒരുക്കങ്ങളിലാണ് ജില്ല. ഇന്ന് നിശ്ശബ്ദ പ്രചാരണം പൂർത്തിയാക്കി നാളെ വോട്ടെടുപ്പിനായി ജനങ്ങൾ പോളിംഗ് ബൂത്തിലെത്തും. വോട്ടെടുപ്പിനായി ജില്ലയിൽ  3173 പോളിംഗ് ബൂത്തുകളാണ് സജ്ജീകരിച്ചിട്ടുള്ളത്.   ജില്ലയിലെ 14 നിയോജകമണ്ഡലങ്ങളിലും പിങ്ക്, യൂത്ത്, ഹരിത, മാതൃകാ പോളിംഗ് ബൂത്തുകൾ സജ്ജീകരിച്ചു. ഓരോ മണ്ഡലത്തിലും ഒന്ന്  വീതം പിങ്ക്, യൂത്ത്, ഹരിത, മാതൃകാ ബൂത്തുകളാണ് ഉള്ളത്. പൂർണ്ണമായും വനിതാ ജീവനക്കാർ  നിയന്ത്രിക്കുന്നതാണ് പിങ്ക് ബൂത്തുകൾ. യുവ ഓഫീസർമാരാണ് യൂത്ത് ബൂത്തുകൾ നിയന്ത്രിക്കുക. 14 ഹരിത ബൂത്തുകളും ക്രമീകരിച്ചിട്ടുണ്ട്.

അനധികൃതമായും മതിയായ രേഖകൾ ഇല്ലാതെയും കൈവശം വയ്ക്കുന്ന  വിലപ്പിടിപ്പുളള വസ്തുക്കൾ (സ്വർണ്ണം, പണം മുതലായവ) പിടിച്ചെടുക്കുന്ന നടപടികൾ തിരഞ്ഞെടുപ്പ് കമ്മീഷന്റെ മാർഗ്ഗനിർദ്ദേശങ്ങൾക്കനുസൃതമായി തുടരും. ആയതിനാൽ യാത്രികർ, തങ്ങൾ കൊണ്ടു പോകുന്ന വിലപ്പിടിപ്പുളള വസ്തുക്കൾ (സ്വർണ്ണം, പണം മുതലായവ) സംബന്ധിച്ച രേഖകൾ കൈവശം വെയ്ക്കുന്നത് പരിശോധനയിൽ സഹായകമാകും.

തമിഴ്നാട് സംസ്ഥാനത്തിലെ വോട്ടിംഗ് തിയതി ഏപ്രിൽ 23 ആയതിനാൽ  ചാലക്കുടിയിലെ മലക്കപ്പാറ ഉൾപ്പെടെയുള്ള അതിർത്തി പരിശോധനകൾ ഏപ്രിൽ 23 വരെ തുടരുകയും സ്ക്വാഡ് ചെക്ക് പോസ്റ്റിൽ പ്രവർത്തിക്കുകയും ചെയ്യും.

ജില്ലയില്‍ ചൂട് കൂടി വരുന്ന സാഹചര്യത്തില്‍ തിരഞ്ഞെടുപ്പ് പ്രചാരണ പ്രവര്‍ത്തനങ്ങളില്‍ ഏര്‍പ്പെടുന്നവരും തിരഞ്ഞെടുപ്പ് ജോലികള്‍ക്ക് നിയോഗിച്ചിട്ടുള്ള ഉദ്യോഗസ്ഥരും വോട്ടര്‍മാരും ആരോഗ്യത്തിലും അല്‍പം ശ്രദ്ധിക്കണമെന്ന് ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ. എല്‍ അനിതകുമാരി അറിയിച്ചു. കനത്ത ചൂടില്‍ നിര്‍ജ്ജലീകരണ സാധ്യതയുള്ളതിനാല്‍ ദാഹം തോന്നിയില്ലെങ്കില്‍ പോലും ധാരാളം വെള്ളം കുടിക്കണം. തിളപ്പിച്ചാറ്റിയതും ശുദ്ധമായ ജലത്തില്‍ തയ്യാറാക്കിയതുമായ പാനീയങ്ങള്‍ കുടിക്കാന്‍ ഉപയോഗിക്കുക. ഉപ്പിട്ട നാരങ്ങാ വെള്ളം, കഞ്ഞി വെള്ളം, സംഭാരം എന്നിവ കുടിക്കുന്നത് നിര്‍ജ്ജലീകരണ സാധ്യത കുറയ്ക്കും.

പോളിംഗ് ഉദ്യോഗസ്ഥർക്കുളള പരിശീലന കേന്ദ്രങ്ങളിലും വരണാധികാരിയുടെ ആസ്ഥാനത്ത് പോസ്റ്റൽ ബാലറ്റ് മുഖേന വോട്ട് ചെയ്യുന്നതിന് സജ്ജമാക്കിയിരുന്ന വോട്ടർ ഫസിലിറ്റേഷൻ സെന്ററുകൾ ഏപ്രിൽ 8 ന് വിതരണ-സ്വീകരണ-കേന്ദ്രങ്ങളിൽ  പ്രവർത്തിക്കും. നാളിതുവരെ സൗകര്യം ഉപയോഗപ്പെടുത്താത്ത എല്ലാ പോളിംഗ് ഉദ്യോഗസ്ഥരും ഏപ്രിൽ 8 ന് വിതരണ-സ്വീകരണ-കേന്ദ്രങ്ങളിലെ വോട്ടർ ഫസിലിറ്റേഷൻ സെന്ററുകൾ മുഖേനയുളള പോസ്റ്റൽ ബാലറ്റ് മുഖേന വോട്ട് ചെയ്യുന്നതിനുളള സൌകര്യം ഉപയോഗിക്കണമെന്നും ജില്ലാ തിരഞ്ഞെടുപ്പ് ഉദ്യോഗസ്ഥ അറിയിച്ചു.

ഏപ്രില്‍ ഒമ്പതിന് നടക്കുന്ന നിയമസഭ തിരഞ്ഞെടുപ്പുമായി ബന്ധപ്പെട്ട് പത്തനംതിട്ട ജില്ലയിലെ 5 മണ്ഡലങ്ങളില്‍ നിയോഗിക്കപ്പെട്ട പോളിംഗ് ഉദ്യോഗസ്ഥര്‍ക്കുളള പരിശീലനം പൂര്‍ത്തീയായി. പരിശീലനത്തിന് പങ്കെടുക്കാത്ത പോളിംഗ് ഉദ്യോഗസ്ഥര്‍ക്ക് മുന്‍പ് നിശ്ചയിച്ചിരുന്ന പരിശീലന കേന്ദ്രങ്ങളില്‍ ഏപ്രില്‍ ഏഴിന് രാവിലെ 10 മുതല്‍ പരിശീലനം സംഘടിപ്പിച്ചിട്ടുണ്ട്. പങ്കെടുക്കാത്ത ഉദ്യോഗസ്ഥര്‍ക്കെതിരെ കര്‍ശന അച്ചടക്ക നടപടി സ്വീകരിക്കുമെന്ന് ജില്ല തിരഞ്ഞെടുപ്പ് ഓഫീസറും ജില്ല കലക്ടറുമായ എസ് പ്രേംകൃഷ്ണന്‍ അറിയിച്ചു.