കോവിഡ് 19 വൈറസ് വ്യാപനം തടയുന്നതിന്റെ ഭാഗമായുളള ബ്രേക്ക് ദി ചെയിന്‍ ക്യാമ്പയിന്‍ അഴിയൂര്‍ ഗ്രാമപഞ്ചായത്തില്‍ ആരംഭിച്ചു. ക്യാമ്പയിനിന്റെ ഭാഗമായി പൊതുജനങ്ങള്‍ക്കായി ബോധവല്‍ക്കരണം നടത്തി.  വാര്‍ഡ് തലത്തില്‍ അംഗന്‍വാടി ടീച്ചര്‍മാര്‍, ആശ വര്‍ക്കര്‍ എന്നിവര്‍ പഞ്ചായത്തിലെ 7300 വീടുകള്‍ സന്ദര്‍ശിച്ച് കൈ കഴുകുന്ന രീതിയും  കൈ കഴുതേണ്ടതിന്റെ പ്രാധാന്യവും വിശദീകരിച്ചു. 60 വയസ്സ് കഴിഞ്ഞവര്‍ക്ക് പ്രത്രേക അവബോധനവും നല്‍ക്കും.

കൊയിലാണ്ടി ലാന്‍ഡ് അക്ക്വിസിഷന്‍ സ്‌പെഷ്യല്‍ തഹസില്‍ദാരുടെ കാര്യാലയത്തില്‍ ഇന്ന് (മാര്‍ച്ച് 18) മുതലുള്ള ലാന്‍ഡ് ട്രിബ്യൂണല്‍ പട്ടയ കേസുകളുടെ വിചാരണ മാറ്റിയതായി കൊയിലാണ്ടി ലാന്‍ഡ് അക്ക്വസിഷന്‍ സ്‌പെഷ്യല്‍ തഹസില്‍ദാര്‍ അറിയിച്ചു.
 

കേന്ദ്ര ടെക്‌സൈറ്റല്‍ മന്ത്രാലയത്തിന്റെ കീഴിലെ അപ്പാരല്‍ ട്രെയിനിംഗ് ആന്‍ഡ് ഡിസൈന്‍ സെന്ററും രാജീവ് ഗാന്ധി നാഷണല്‍ ഇന്‍സ്റ്റിറ്റ്യൂട്ട് ഓഫ് യൂത്ത് ഡവലപ്‌മെന്റും സംയുക്തമായി നടത്തുന്ന മൂന്ന് വര്‍ഷത്തെ ബി വോക് ഡിഗ്രി ഇന്‍ ഫാഷന്‍  ഡിസൈന്‍ ആന്‍ഡ് റീട്ടെയില്‍ റഗുലര്‍ കോഴ്‌സിലേക്ക് അഡ്മിഷന്‍ ആരംഭിച്ചു. ഫോണ്‍ : 9746394616, 9744917200.
 

2019 ആഗസ്റ്റ്  മുതല്‍ 2020 ജനുവരി വരെയുള്ള തൊഴില്‍ രഹിത വേതനമായ 720  രൂപ അര്‍ഹരായ ഗുണഭോക്താക്കള്‍ക്ക്   നല്‍കുന്നതിന് സര്‍ക്കാര്‍ ഉത്തരവായി.  തൊഴില്‍രഹിത വേതന അലോട്ട്‌മെന്റ്  ബന്ധപ്പെട്ട തദ്ദേശ സ്വയംഭരണസ്ഥാപനങ്ങള്‍ക്ക്   നല്‍കിയിട്ടുണ്ട്.  അര്‍ഹരായ   ഗുണഭോക്താക്കള്‍  തുക കൈപ്പറ്റേണ്ടതാണെന്ന് ജില്ലാ എംപ്ലോയ്‌മെന്റ് ഓഫീസര്‍  അറിയിച്ചു.
 

കുന്ദമംഗലം ഗ്രാമപഞ്ചായത്തിലെ മാതാംപറമ്പ്-പുല്‍പറമ്പ് റോഡിന് 13.60 ലക്ഷം രൂപയുടെ ഭരണാനുമതി ലഭ്യമാക്കിയതായി പി.ടി.എ റഹീം  എം.എല്‍.എ അറിയിച്ചു. എം.എല്‍.എയുടെ ആസ്തി വികസന പദ്ധതിയില്‍ ഉള്‍പ്പെടുത്തിയാണ് റോഡിന് തുക അനുവദിച്ചത്. മര്‍ക്കസ് ഇംഗ്ലീഷ് മീഡിയം സ്‌കൂളിലേക്കുള്ള എളുപ്പ വഴിയായി ഉപയോഗിക്കാന്‍ പറ്റുന്ന ഈ റോഡ് കാമ്പ്രത്ത് ചക്കാലക്കല്‍ റോഡുമായി ബന്ധിപ്പിക്കുന്നതാണ്.
 

പ്രതിരോധത്തിന്റെ ഭാഗമായി കർശന നിയന്ത്രണം നടപ്പിലാക്കി  മേലടി ബ്ലോക്ക്‌ പഞ്ചായത്തും. വൈറസ് വ്യാപനം തടയാൻ ആരോഗ്യ വകുപ്പ് തുടക്കം കുറിച്ച ബ്രേക്ക് ദ ചെയിൻ ക്യാമ്പയിനിന്റെ ഭാഗമായി ബ്ലോക്ക് പഞ്ചായത്തിൽ ഹാന്റ് സാനിറ്റൈസർ സ്ഥാപിച്ചു. ബ്ലോക്ക് പഞ്ചായത്തിലെ ജീവനക്കാർക്കും വിവിധ ആവശ്യങ്ങൾക്കായി പഞ്ചായത്തിൽ എത്തുന്നവർക്കും ഉപയോഗിക്കത്തക്ക വിധത്തിലാണ് സാനിറ്റൈസർ സ്ഥാപിച്ചത്.

കോവിഡ് -19 വൈറസ് മുൻകരുതലുകൾ സംബന്ധിച്ച് മേലടി ബ്ലോക്ക് പഞ്ചായത്തിന്റെ ആഭിമുഖ്യത്തിൽ ബോധവൽകരണം നടത്തി. ബ്ലോക്ക്, ഗ്രാമ പഞ്ചായത്ത് ജനപ്രതിനിധികൾ, ഉദ്യോഗസ്ഥർ എന്നിവർക്കായി മേലടി സാമൂഹികാരോഗ്യ കേന്ദ്രത്തിന്റെ  നേതൃത്വത്തിലാണ് ബോധവൽകരണം നടത്തിയത്. ഡോ മംഗള നടപടികളെക്കുറിച്ച് വിശദീകരിച്ചു.  ബ്ലോക്ക് പഞ്ചായത്ത് പരിധിയിൽ കോവിഡ് - 19 ബാധിക്കാതിരിക്കാൻ എല്ലാ മുൻകരുതലുകളും സ്വീകരിക്കുമെന്ന് ബ്ലോക്ക് പഞ്ചായത്ത് പ്രസിഡണ്ട് കെ കുഞ്ഞിരാമൻ പറഞ്ഞു. 

കോഴിക്കോട് ബ്ലോക്ക് പഞ്ചായത്തിന് കീഴിലുള്ള  വീടുകളിൽ കൊറോണ മുൻകരുതലുകളെയും  രോഗ ലക്ഷണങ്ങളെയും കുറിച്ച് പ്രതിപാദിക്കുന്ന ഏഴായിരം നോട്ടീസുകൾ വിതരണം ചെയ്തതായി ബ്ലോക്ക് പഞ്ചായത്ത് പ്രസിഡന്റ് എം മനോജ് കുമാർ അറിയിച്ചു. വിവാഹം, ഗൃഹപ്രവേശനം തുടങ്ങിയ ചടങ്ങുകൾ നടക്കാനിടയുള്ള സ്ഥലങ്ങളും വിദേശങ്ങളിൽ നിന്നു നാട്ടിലേക്ക് തിരിച്ചെത്തിയവരുള്ള വീടുകളും കേന്ദ്രീകരിച്ച് എമർജൻസി റെസ്പോൺസ് ടീമംഗങ്ങളാണ് നോട്ടീസ് വിതരണം ചെയ്തത്. ഇതിനുപുറമേ ബ്ലോക്ക് പഞ്ചായത്തിൽ ബ്രേക്ക് ദ ചെയിൻ ക്യാമ്പയിന്റെ ഭാഗമായി ഹാൻഡ് ഡാനിറ്റൈസറും സ്ഥാപിച്ചിട്ടുണ്ട്.

കൊറോണ വൈറസ് തടയാനുള്ള മുൻകരുതൽ നടപടികളുടെ ഭാഗമായി എല്ലാ ഹോട്ടലുകളിലും റിസോർട്ടുകളിലും സാനിറ്റൈസറുകൾ സ്ഥാപിക്കണമെന്ന് ജില്ലാ കലക്ടർ സാംബശിവ റാവു നിർദേശിച്ചു. മുറികൾ വൃത്തിയാക്കുന്നതിന് അണുനാശിനി ഉപയോഗിക്കുകയും വൃത്തിയാക്കുന്നവർക്ക് നിർബന്ധമായും മാസ്ക്, ഗ്ലൗസ്, സാനിറ്റൈസർ തുടങ്ങിയവ നൽ കുകയും ചെയ്യണം. ലിഫ്റ്റ് നിശ്ചിത ഇടവേളകളിൽ അണുവിമുക്തമാക്കണം. ആളുകൾ കൂടുന്ന ചടങ്ങുകൾ ഉണ്ടാകുമ്പോൾ ആവശ്യമായ മുൻകരുതലുകൾ എടുക്കേണ്ടതാണ്. വ്യക്തികൾ തമ്മിൽ നിശ്ചിത അകലം ഉണ്ടാക്കാൻ ശ്രദ്ധിക്കണം.