മലപ്പുറം ഗവ. കോളജ് എന്‍.എസ്.എസ് യൂനിറ്റിന് കീഴില്‍ കോട്ടപ്പടി താലൂക്കാശുപത്രിയിലെ രോഗികള്‍ക്കും കൂട്ടിരിപ്പുകാര്‍ക്കുമായി നടത്തി വന്നിരുന്ന ഷെയര്‍ എ മീല്‍ പദ്ധതി മധ്യവേനലവധി കഴിഞ്ഞ് ഇന്ന് (ജൂണ്‍ 19) പുനരാരംഭിക്കുന്നു. രാവിലെ 10 ന് ജില്ലാ മെഡിക്കല്‍ ഓഫീസര്‍ ഡോ. കെ സക്കീന ഉദ്ഘാടനം ചെയ്യും.

പെരിന്തല്‍മണ്ണ ഗവ.പോളിടെക്‌നിക് കോളജിലെ തുടര്‍ വിദ്യാഭ്യാസ ഉപകേന്ദ്രത്തിനു കീഴില്‍ തുടങ്ങുന്ന ഹീറ്റിങ് ആന്‍ഡ് വെന്റിലേഷന്‍ എയര്‍കണ്ടീഷനിങ് റഫ്രിജറേഷന്‍ ആന്‍ഡ് എയര്‍കണ്ടീഷനിങ്, ഇലക്ട്രിക്കല്‍ വയറിങ് എന്നീ കോഴ്‌സുകളിലേക്ക് എസ്.എസ്.എല്‍.സി   പാസ്സായവരില്‍ നിന്നും അപേക്ഷ ക്ഷണിച്ചു. ഫോണ്‍ 04933 228045.

ജില്ലാ എംപ്ലോയ്‌മെന്റ് എക്‌സ്‌ചേഞ്ചില്‍ പ്രവര്‍ത്തിക്കുന്ന എംപ്ലോയബിലിറ്റി സെന്ററില്‍ പത്താംക്ലാസ് മുതല്‍ ബിരുദാനന്തര ബിരുദം, പ്രൊഫഷനല്‍ ബിരുദം /ഡിപ്ലോമ /സര്‍ട്ടിഫിക്കറ്റ് മുതലായവ നേടിയ നാല്‍പ്പത് വയസ്സില്‍ താഴെയുള്ളവര്‍ക്ക് സ്വകാര്യ മേഖലയിലേക്ക് നിയമനം ലഭിക്കുന്നതിന് വേണ്ടിയുള്ള ഒറ്റത്തവണ രജിസ്‌ട്രേഷന്‍ പെരിന്തല്‍മണ്ണ എംപ്‌ളോയ്‌മെന്റ് എക്‌സ്‌ചേഞ്ചില്‍ ജൂണ്‍ 22  രാവിലെ 10 ന് നടക്കും. ഏതെങ്കിലും തിരിച്ചറിയല്‍ രേഖയുടെ കോപ്പിയും 250 രൂപയും നല്‍കി ഒറ്റത്തവണ ആജീവനാന്ത രജിസ്‌ട്രേഷന്‍ എടുക്കാം. ഫോണ്‍ : 04832 734 737.

അന്താരാഷ്ട്ര ഒളിംപിക്സ് ദിനാഘോഷത്തിന്റെ ഭാഗമായി ജില്ലാ സ്പോര്‍ട്സ് കൗണ്‍സിലും ജില്ലാ ഒളിംപിക്സ് അസോസിയേഷനും സംയുക്തമായി ജൂണ്‍ 23ന് കൂട്ടയോട്ടം നടത്തുന്നു. കൂട്ടയോട്ടത്തിന്റെ ഫ്ളാഗ് ഓഫ് രാവിലെ എട്ടിന് മലപ്പുറം എംഎസ്പി സ്‌കൂള്‍ പരിസരത്ത് ജില്ല പൊലീസ് മേധാവി ടി. നാരയണന്‍ നിര്‍വഹിക്കും. പി.ഉബൈദുള്ള എംഎല്‍എ മുഖ്യാതിഥിയാവും.

കാട്ടുനായിക്ക വിഭാഗത്തിലെ ജ•നാ കേള്‍വി ശക്തിയില്ലാത്ത ആറു വയസ്സുകാരിക്ക് സ്‌കൂളിലേക്ക് വാഹനത്തില്‍ പോകാന്‍ സര്‍ക്കാര്‍ സഹായം ലഭ്യമാക്കും. ചാലിയാര്‍ ഗ്രാമപഞ്ചായത്തിലെ വെണ്ണേക്കോട് കോളനിയിലെ പത്മനാഭന്‍-സീമ ദമ്പതികളുടെ മകളായ ചിഞ്ചുവിനാണ് ബഡ്‌സ് സ്‌കൂളിലെത്തിക്കുന്നതിന് ധനസഹായം നല്‍കാന്‍ ജില്ലാ കലക്ടര്‍ അമിത് മീണയുടെ നേതൃത്വത്തില്‍ നടന്ന പട്ടിക വര്‍ഗ വികസനത്തിനായുള്ള ജില്ലാതല വര്‍ക്കിങ് ഗ്രൂപ്പ് യോഗത്തില്‍ തീരുമാനിച്ചത്.

വായനാദിനത്തിന്റെ ജില്ലാതല ഉദ്ഘാടനം ഇന്ന് (ജൂണ്‍ 19) മലപ്പുറം ഗവ. ഗേള്‍സ് ഹയര്‍ സെക്കന്‍ഡറി സ്‌കൂളില്‍ ജില്ലാ പഞ്ചായത്ത് പ്രസിഡന്റ് എ.പി. ഉണ്ണികൃഷ്ണന്‍ നിര്‍വഹിക്കും. രാവിലെ 10 ന് നടക്കുന്ന ചടങ്ങില്‍  ജില്ലാ കലക്ടര്‍ അമിത് മീണ അധ്യക്ഷനാവും. നഗരസഭാ ചെയര്‍പേഴ്‌സണ്‍ സി.എച്ച് ജമീല വായനാദിന പ്രതിജ്ഞ ചൊല്ലിക്കൊടുക്കും. മോയിന്‍കുട്ടി വൈദ്യര്‍ മാപ്പിള കലാ അക്കാദമി ചെയര്‍മാന്‍ ടി.കെ ഹംസ മുഖ്യ പ്രഭാഷണം നടത്തും.