കോവിഡ് 19 രോഗനിയന്ത്രണത്തിന്റെ ഭാഗമായി ജില്ലയിലെ സ്വകാര്യ ആശുപത്രികളിലെ ഡോക്ടര്‍മാര്‍ക്കും ഇന്‍ഫെക്ഷന്‍ കണ്‍ട്രോള്‍ വിഭാഗത്തിലെ ജീവനക്കാര്‍ക്കും രണ്ടാംഘട്ട പരിശീലനം നല്‍കി. നിലവിലുള്ള രോഗാവസ്ഥയ്ക്ക് അനുസരിച്ച് സ്വീകരിക്കേണ്ട ചികിത്സാരീതികള്‍, സമീപനത്തില്‍ ഉണ്ടാകേണ്ട മാറ്റം, റിപ്പോര്‍ട്ടിംഗ് തുടങ്ങിയ വിഷയങ്ങളെക്കുറിച്ചാണ് പരിശീലനം നല്‍കിയത്. 

കോന്നി നിയോജകമണ്ഡലത്തിലെ തദേശസ്വയംഭരണ സ്ഥാപനങ്ങള്‍ കോവിഡ് 19 വൈറസ് പ്രതിരോധ പ്രവര്‍ത്തനങ്ങളില്‍ സ്വീകരിച്ച നടപടികളും മുന്‍കരുതലും വിലയിരുത്തുന്നതിനായി കോന്നി താലൂക്ക് കോണ്‍ഫറന്‍സ്ഹാളില്‍ കെ.യു ജനീഷ്‌കുമാര്‍ എം.എല്‍.എ അധ്യക്ഷതയില്‍ യോഗത്തില്‍ ചേര്‍ന്നു. ആരോഗ്യവകുപ്പിന്റെ നിര്‍ദേശങ്ങള്‍ കൃ3333ത്യമായി നടപ്പിലാക്കണമെന്നും പഞ്ചായത്ത് വാര്‍ഡ്തല സാനിട്ടേഷന്‍ കമ്മിറ്റികള്‍ കൂടണമെന്നും എം.എല്‍.എ പറഞ്ഞു.

ആറന്മുള നിയോജകമണ്ഡലത്തിലെ തദേശസ്വയംഭരണ സ്ഥാപനങ്ങള്‍ കോവിഡ് 19 രോഗബാധാ പ്രതിരോധ പ്രവര്‍ത്തനങ്ങളില്‍ സ്വീകരിച്ച നടപടികളും മുന്‍കരുതലും വിലയിരുത്തുന്നതിനായി യോഗംചേര്‍ന്നു. പത്തനംതിട്ട ടൗണ്‍ ഹാളില്‍നടന്ന യോഗത്തില്‍ വീണാ ജോര്‍ജ് എ.എല്‍.എ അധ്യക്ഷത വഹിച്ചു.

കോവിഡ് 19 പ്രതിരോധത്തിന്റെ ഭാഗമായി പത്തനംതിട്ട ജില്ലയില്‍ പ്രവര്‍ത്തിക്കുന്ന ഉദ്യോഗസ്ഥര്‍ക്ക് വേഗത്തില്‍ വിവരങ്ങള്‍ കൈമാറുന്നതിനായി കോമ്പാറ്റ് (COM-BAT) എന്ന പുതിയ ആന്‍േഡ്രായിഡ് ആപ്ലിക്കേഷന്‍ പരിചയപ്പെടുത്തുകയാണ് തിരുവല്ല മാക്ഫാസ്റ്റ് കോളജിലെ ജീവനക്കാരും വിദ്യാര്‍ഥികളും. ജില്ലാ കളക്ടര്‍ പി.ബി നൂഹിന്റെ നിര്‍ദേശപ്രകാരം കോവിഡ് 19 പ്രതിരോധപ്രവര്‍ത്തനങ്ങള്‍ ഏകോപിപ്പിക്കുന്നതിനായി തിരുവല്ല മാക്ഫാസ്റ്റ് കോളജിന്റെയും നാഷണല്‍ ഇന്‍ഫര്‍മാറ്റിക്സ് സെന്ററിന്റെയും ഐ.ടി മിഷന്റെയും സഹായത്തോടെയാണ് ഈ ആപ്ലിക്കേഷന്‍ നിര്‍മിച്ചിരിക്കുന്നത്. നാലു ദിവസംകൊണ്ടാണ് ആപ്ലിക്കേഷന്‍ യഥാര്‍ഥ്യമായത്.  

പത്തനംതിട്ട ജില്ലയില്‍ കോവിഡ്-19 പ്രതിരോധ പ്രവര്‍ത്തനങ്ങളുമായി ബന്ധപ്പെട്ട് കളക്ടറേറ്റില്‍ ജില്ലാ കളക്ടര്‍ പി.ബി.നൂഹിന്റെ നേതൃത്വത്തില്‍ ആരംഭിച്ച മാധ്യമ നിരീക്ഷണ കേന്ദ്രം പ്രത്യേക  ഫെയ്‌സ്ബുക്ക് പേജ്തുറന്നു. മാധ്യമ നിരീക്ഷണകേന്ദ്രം പത്തനംതിട്ട ( Media Surveillance Centre Pathanamthitta ) എന്ന പേരിലുള്ള ഫെയ്‌സ്ബുക്ക് പേജിലൂടെ കൊറോണയുമായി ബന്ധപ്പെട്ട് അച്ചടി, ദൃശ്യ, സാമൂഹിക മാധ്യമങ്ങളിലൂടെ പ്രചരിക്കുന്ന വ്യാജസന്ദേശങ്ങള്‍, ജനങ്ങളുടെ സംശയങ്ങള്‍, വിവിധ ആവശ്യങ്ങള്‍ എന്നിവ ജില്ലാ ഭരണകൂടവുമായി പങ്കുവയ്ക്കുന്നതിന് അവസരംലഭിക്കും.

തിരുവല്ല റെയിവേസ്‌റ്റേഷനിലും ട്രാന്‍സ്‌പോര്‍ട്ട് സ്റ്റാന്‍ഡുകളിലും സ്‌ക്രീനിങ്ങും ബോധവത്കരണവും ശക്തമാക്കണമെന്ന് ജില്ലാ കളക്ടര്‍ പി.ബി നൂഹ് പറഞ്ഞു. കോവിഡ് 19 പ്രതിരോധത്തിന്റെ ഭാഗമായി തിരുവല്ല റെയില്‍വേ സ്‌റ്റേഷനിലെയും കെ.എസ്.ആര്‍.ടി.സി ബസ് സ്റ്റാന്‍ഡിലെയും സ്‌ക്രീനിംങ് ടെസ്റ്റ്, ബോധവത്കരണ പ്രവര്‍ത്തനങ്ങള്‍ തുടങ്ങിയവ വിലയിരുത്താന്‍ നടത്തിയ സന്ദര്‍ശനത്തിന് ശേഷം സംസാരിക്കുകയായിരുന്നു ജില്ലാ കളക്ടര്‍ പി.ബി നൂഹ്. 

ജില്ലയില്‍ കോവിഡ് 19 പ്രതിരോധം ശക്തമാക്കുന്നതിന്റെ ഭാഗമായി തിരുവല്ല നിയോജക മണ്ഡലത്തിന് കീഴില്‍വരുന്ന എല്ലാ തദ്ദേശസ്വയംഭരണ സ്ഥാപനങ്ങളും വീടുകളില്‍ നിരീക്ഷണത്തില്‍ കഴിയുന്നവര്‍ ആരോഗ്യവകുപ്പിന്റെ നിര്‍ദ്ദേശങ്ങള്‍ പാലിക്കുന്നുവെന്ന്  ഉറപ്പുവരുത്തണമെന്ന് മാത്യു ടി തോമസ് എം.എല്‍.എ പറഞ്ഞു. തിരുവല്ല പി.ഡബ്ല്യു.ഡി റെസ്റ്റ് ഹൗസില്‍ തദ്ദേശസ്വയംഭരണ മേധാവികള്‍ക്കായി സംഘടിപ്പിച്ച അവലോകന യോഗം ഉദ്ഘാടനം ചെയ്ത് സംസാരിക്കുകയായിരുന്നു എം.എല്‍എ.

രോഗ പ്രതിരോധ ശേഷി വര്‍ധിപ്പിക്കുന്നതിനുള്ള  ഹോമിയോപ്പതി മരുന്നുകള്‍ ജില്ലയിലെ എല്ലാ സര്‍ക്കാര്‍, സ്വകാര്യ ഹോമിയോ ചികിത്സാ സ്ഥാപനങ്ങളിലും ലഭ്യമാകുമെന്ന് ഹോമിയോപ്പതി ജില്ലാ മെഡിക്കല്‍ ഓഫീസര്‍ ഡോ.ഡി. ബിജുകുമാര്‍ അറിയിച്ചു. കേന്ദ്ര സര്‍ക്കാര്‍ ആയുഷ് വകുപ്പ് പ്രോട്ടോക്കോള്‍ പ്രകാരമാണ് മരുന്ന് നല്‍കുന്നത്.  മരുന്നുകള്‍ ഉപയോഗിക്കുന്നതിനൊപ്പം  ആരോഗ്യ, ആയുഷ് വകുപ്പുകളുടെ നിര്‍ദേശങ്ങള്‍ കര്‍ശനമായി പാലിക്കണം. സര്‍ക്കാര്‍ ഹോമിയോ ആശുപത്രികളിലേക്ക് ആവശ്യമായ മരുന്നുകള്‍ ആലപ്പുഴയിലെ സര്‍ക്കാര്‍ ഹോമിയോ ഔഷധ നിര്‍മാണ ശാലയില്‍ നിന്ന് എത്തിച്ചിട്ടുണ്ട്.

ജില്ലയില്‍ വീടുകളില്‍ പൊതുസമ്പര്‍ക്കമില്ലാതെ കഴിയുന്നവരുടെ എണ്ണം 1301 ആയി. ഇന്നലെ 122 പേര്‍ക്കൂ കൂടി പുതിയതായി ഹോം ക്വാറന്‍റയിന്‍ നിര്‍ദേശിച്ചു.

രോഗലക്ഷണങ്ങള്‍ കണ്ടെത്തിയതിനെത്തുടര്‍ന്ന് രണ്ടു പേരെ ഇന്നലെ ആശുപത്രി നിരീക്ഷണത്തിലാക്കി. പത്തനംതിട്ട സ്വദേശിനിയായ യുവതിയെയും രോഗം സ്ഥിരീകരിച്ച് കോട്ടയം മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുന്ന യുവാവ് നേരിട്ട് സമ്പര്‍ക്കം പുലര്‍ത്തിയ കുട്ടിയെയുമാണ് മെഡിക്കല്‍ കോളേജില്‍ പ്രവേശിപ്പിച്ചത്. ഇവിടെ  കഴിഞ്ഞിരുന്ന മൂന്നു പേരെ ആശുപത്രി നിരീക്ഷണത്തില്‍നിന്ന് ഒഴിവാക്കി. ഇപ്പോള്‍ ആകെ ഒന്‍പതു പേരാണ് നിരീക്ഷണത്തിലുള്ളത്.