കേന്ദ്ര മോട്ടോർ വാഹന നിയമപ്രകാരം ഭാരത് സ്റ്റേജ് ആറ് മലിനീകരണ പദ്ധതിയിൽ വരുന്ന വാഹനങ്ങൾ മാത്രമേ ഏപ്രിൽ ഒന്നു മുതൽ രജിസ്റ്റർ ചെയ്യാൻ അനുവദിക്കുകയുള്ളുവെന്ന് തൃശൂർ റീജണൽ ട്രാൻസ്‌പോർട്ട് ഓഫീസർ അറിയിച്ചു. ഭാരത് സ്റ്റേജ് ആറ് മലിനീകരണ പരിധിയിൽ വരുന്ന വാഹനങ്ങൾ മാർച്ച് 31 ന് മുൻപായി രജിസ്റ്റർ ചെയ്യണമെന്നും അറിയിപ്പിൽ പറയുന്നു.  

കോവിഡ് 19 പടർന്നു പിടിക്കുന്ന സാഹചര്യത്തിൽ കേരള കർഷക തൊഴിലാളി ക്ഷേമനിധിയിൽ അംശാദായം സ്വീകരിക്കുന്നതിനും പുതിയ അംഗങ്ങളെ ചേർക്കുന്നതിനുമായി നടത്താൻ ഉദ്ദേശിച്ചിരുന്ന സിറ്റിങ്ങ് മാറ്റി വെച്ചു. മാർച്ച് 17, 19, 21, 24, 26, 28 എന്നീ തീയതികളിലായി വിവിധ പഞ്ചായത്തുകളിൽ നടത്താനിരുന്ന പഞ്ചായത്ത് തല സിറ്റിങ്ങുകളാണ് മാറ്റിവെച്ചത്.

കേരള കർഷക തൊഴിലാളി ക്ഷേമനിധി ബോർഡിലേക്കുള്ള അംഗത്വം പുനസ്ഥാപിക്കാനുള്ള തീയതി 2021 ഫെബ്രുവരി 28 വരെയാക്കി കാലാവധി നീട്ടി. 2020 മാർച്ച് ഒന്നുമുതൽ ഇതിന് അവസരം ഒരുക്കിയിട്ടുണ്ട്. ക്ഷേമനിധി ബോർഡിലേക്കുള്ള അംശാദായം അടയ്ക്കുന്നതിൽ 24 മാസത്തിൽ കൂടുതൽ കുടിശ്ശിക വരുത്തിയതിനാൽ അംഗത്വം നഷ്ടപ്പെട്ട തൊഴിലാളികൾക്കാണ് കാലപരിധി ഇല്ലാതെ അംശാദായ കുടിശ്ശിക പിഴ സഹിതം അടച്ച് അംഗത്വം പുനഃസ്ഥാപിക്കുന്നതിന് 12 മാസത്തെ സമയം നൽകിയത്.

കൊടുങ്ങല്ലൂർ നഗരസഭയിൽ വിശപ്പുരഹിത കേരളം പദ്ധതിയുടെ ഭാഗമായി 25 രൂപയ്ക്ക് ഉച്ചയൂണ് നൽകുന്ന സുഭിക്ഷ ഹോട്ടലുകൾ ആരംഭിക്കുവാൻ നഗരസഭ കൗൺസിൽ യോഗം തീരുമാനിച്ചു. അഞ്ച് ശതമാനം ഊണ് പാവപ്പെട്ടവർക്ക് സൗജന്യമായി നൽകും. ഇതിനായി 30,000 രൂപ റിവോൾവിംഗ് ഫണ്ട് അനുവദിക്കും.
നഗരസഭയിലെ എല്ലാ വാർഡുകളും സമ്പൂർണ്ണ ശുചിത്വ വാർഡുകളായി പ്രഖ്യാപിക്കാനുള്ള പ്രവർത്തനങ്ങൾ നടത്തും. ഇതിനായി ബയോഗ്യാസ് പ്ലാന്റ് 1350 രൂപയ്ക്കും ബയോഡൈജസ്റ്റർ പോട്ടുകൾ 155 രൂപയ്ക്കും പൈപ്പ് കമ്പോസ്റ്റ് 100 രൂപയ്ക്കും വീടുകൾക്ക് നൽകും.

ചൊവ്വന്നൂർ ഐസിഡിഎസിനു കീഴിൽ പ്രവർത്തിക്കുന്ന 125 അങ്കണവാടികൾക്ക് പ്രീസ്‌കൂൾ കിറ്റ് വിതരണം ചെയ്യുന്നതിന് ദർഘാസ് ക്ഷണിച്ചു. ദർഘാസ് സ്വീകരിക്കുന്ന അവസാന തീയതി മാർച്ച് 20 ഉച്ച രണ്ട് മണി. ഫോൺ: 04885 223499.
 

ഗുരുവായൂർ നഗരസഭ ആരോഗ്യ സ്റ്റാൻഡിംങ് കമ്മിറ്റി ചെയർപേഴ്സനായി എം. എ ഷാഹിനയെ തെരഞ്ഞെടുത്തു. നിലവിൽ നഗരസഭ ഒന്നാം വാർഡ് പ്രതിനിധിയാണ് ഷാഹിന. നഗരസഭ കൗൺസിൽ ഹാളിൽ ചേർന്ന തെരഞ്ഞെടുപ്പിൽ ഡെപ്യൂട്ടി കളക്ടർ പി. കാവേരിക്കുട്ടി ഭരണാധികാരിയായി.

വരവൂർ ഗ്രാമപഞ്ചായത്ത് 2020-21 വർഷത്തെ പദ്ധതി രൂപീകരണത്തിന്റെ ഭാഗമായിട്ടുള്ള വികസന സെമിനാർ നടത്തി. ഗ്രാമപഞ്ചായത്ത് പ്രസിഡന്റ് സി വിജയലക്ഷ്മിയുടെ അധ്യക്ഷതയിൽ ജില്ല പഞ്ചായത്ത് മെമ്പർ കെ പി രാധാകൃഷ്ണൻ ഉദ്ഘാടനം നിർവഹിച്ചു. 2020-21 വാർഷിക പദ്ധതിയിൽ 5,07,53,000 രൂപ വകയിരുത്തിയിട്ടുണ്ട്. ഇതിൽ ലൈഫ്, പാർപ്പിടം പദ്ധതിയ്ക്കായി 41,60,800 ഉത്പാദനമേഖലയ്ക്ക് 34,44,000 രൂപയും മാലിന്യം, ജലസംരക്ഷണത്തിനായി (ഹരിതകേരളം) 11,48,000 രുപയും വകയിരുത്തിയിട്ടുണ്ട്. ബ്ലോക്ക് പഞ്ചായത്ത് മെമ്പർമാർ, പഞ്ചായത്ത് മെമ്പർമാർ, ഉദ്യോഗസ്ഥർ എന്നിവർ സെമിനാറിൽ പങ്കെടുത്തു.

2021 ലെ നിയമസഭ തിരഞ്ഞെടുപ്പിന്റെ മുന്നൊരുക്കത്തിന്റെ ഭാഗമായി പോളിംഗ് ബൂത്തുകൾ ക്രമീകരിക്കുന്നത് സംബന്ധിച്ച് ചർച്ച ചെയ്യുന്നതിനായി എല്ലാ രാഷ്ട്രീപാർട്ടി പ്രതിനിധികളുടേയും ബന്ധപ്പെട്ട ഉദ്യോഗസ്ഥരുടേയും യോഗം ഇലക്ഷൻ ഡെപ്യൂട്ടി കളക്ടറുടെ ചേമ്പറിൽ മാർച്ച് 17 രാവിലെ 11 ന് ചേരും.