സീമാറ്റ് - കേരള ഡയറക്ടര്‍ 01.04.2017, 07.04.2017 എന്നീ തീയതികളില്‍ വിവിധ തസ്തികകളിലേക്ക് കരാര്‍ അടിസ്ഥാനത്തില്‍ നിയമിക്കുന്നതിന് അപേക്ഷ ക്ഷണിച്ച നടപടി റദ്ദാക്കി. എക്‌സിക്യൂട്ടീവ് കമ്മിറ്റി യോഗമാണ് റദ്ദാക്കിയത്.  വിശദമായ നോട്ടീസ് സീമാറ്റ് - കേരളയുടെ വെബ്‌സൈറ്റില്‍ (www.siemat.kerala.gov.in) പ്രസിദ്ധീകരിച്ചിട്ടുണ്ട്.

ഇതു സംബന്ധിച്ച് അക്ഷേപം ഉള്ളവര്‍ ഏഴ് ദിവസത്തിനുള്ളില്‍ സീമാറ്റ് - കേരള ഡയറക്ടറെ രേഖാമൂലം നേരിട്ടോ, തപാല്‍ വഴിയോ, ഇ-മെയിലിലൂടെയോ അറിയിക്കണം,

പി.എന്‍.എക്‌സ്.485/18

നാഗ്പൂരില്‍ നടന്ന ദേശീയ ഫയര്‍ സര്‍വീസ് ഗെയിംസില്‍ സ്വര്‍ണ മെഡല്‍ നേടിയ കേരള ഫയര്‍ ആന്റ് റെസ്‌ക്യു സര്‍വീസ് ഉദ്യോഗസ്ഥരെ മുഖ്യമന്ത്രി പിണറായി വിജയന്‍ അനുമോദിച്ചു. നിയമസഭാ മന്ദിരത്തിലെ മുഖ്യമന്ത്രിയുടെ ചേംബറില്‍ നടന്ന ചടങ്ങില്‍ ഫയര്‍ ആന്റ് റെസ്‌ക്യു സര്‍വീസ് മേധാവി ടോമിന്‍ തച്ചങ്കരിയും വകുപ്പിലെ ഉന്നത ഉദ്യോഗസ്ഥരും സന്നിഹിതരായിരുന്നു. 

മത്‌സരങ്ങളില്‍ കേരളത്തിന് അഞ്ച് സ്വര്‍ണവും എട്ട് വെള്ളിയും നാലു വെങ്കല മെഡലുകളും ലഭിച്ചു. അത്‌ലറ്റിക്‌സ്, ഫുട്ബാള്‍, വോളിബാള്‍, ഫയര്‍ ഫൈറ്റിംഗ് ആന്റ് റെസ്‌ക്യു ഡ്രില്ലുകള്‍ എന്നിവയിലായിരുന്നു മത്‌സരങ്ങള്‍.   

പി.എന്‍.എക്‌സ്.484/18

കുടുംബശ്രീയുടെ നേതൃത്വത്തില്‍ ഈ മാസം 12, 13 തിയതികളില്‍ നടക്കുന്ന സംസ്ഥാന ബഡ്‌സ് ഫെസ്റ്റില്‍ കോഴിക്കോട് വരെ കുട്ടികളെ കൊണ്ടുപോയി തിരികെ എത്തിക്കുന്നതിനു വേണ്ടി 41 സീറ്റുള്ള (എസി പുഷ് ബാക്ക്) ബസ് ലഭ്യമാക്കുന്നതിന് താല്പര്യമുള്ള വ്യക്തികളില്‍ നിന്നോ, ഏജന്‍സികളില്‍ നിന്നോ ക്വട്ടേഷന്‍ ക്ഷണിച്ചു. ക്വട്ടേഷന്‍ കുടുംബശ്രീ ജില്ലാ മിഷന്‍ ഓഫീസില്‍ നാളെ (9) വൈകുന്നേരം മൂന്നു മണിവരെ സ്വീകരിക്കും. വിശദവിവരങ്ങള്‍ സിവില്‍സ്റ്റേഷനില്‍ പ്രവര്‍ത്തിക്കുന്ന കുടുംബശ്രീ ജില്ലാ മിഷന്‍ ഓഫീസിലെ നോട്ടീസ് ബോര്‍ഡില്‍ പതിച്ചിട്ടുണ്ട്. കൂടുതല്‍ വിവരങ്ങള്‍ക്ക് 04994 256111.
 

       എന്‍.എ നെല്ലിക്കുന്ന്  എംഎല്‍എയുടെ  പ്രത്യേക ആസ്തിവികസന ഫണ്ടില്‍ നിന്ന് കാസര്‍കോട് നിയോജക മണ്ഡലത്തിലെ ബദിര ടി വി സ്റ്റേഷന്‍ ഫസ്റ്റ് ക്രോസ് റോഡ് കോണ്‍ക്രീറ്റിംഗിന്  അഞ്ച് ലക്ഷം രൂപ അനുവദിച്ചു. മൊഗ്രാല്‍പുത്തൂര്‍ ഗ്രാമപഞ്ചായത്തിലെ  മജ്ജല്‍-ബെല്‍ കോളനി റോഡ്  കോണ്‍ക്രീറ്റിംഗിന്  രണ്ട് ലക്ഷം രൂപയും, മധൂര്‍ ഗ്രാമപഞ്ചായത്തിലെ  കൊല്ലങ്കാന-എംജി നഗര്‍ റോഡ് കോണ്‍ക്രീറ്റിംഗിന്  ആറ് ലക്ഷം  രൂപയും കാറഡുക്ക ഗ്രാമപഞ്ചായത്തിലെ  എരിഞ്ചേരി-പാണൂര്‍ക്കൊച്ചി  ചെറമ്മല്‍ റോഡ് ടാറിംഗിന്  ഏഴ് ലക്ഷം രൂപയും അനുവദിച്ചു.      

    കെ കുഞ്ഞിരാമന്റെ എം എല്‍ എയുടെ  പ്രത്യേക ആസ്തിവികസന ഫണ്ടില്‍ നിന്ന് ഉദുമ നിയോജക മണ്ഡലത്തിലെ 75 സ്‌കൂളുകള്‍ക്ക് കമ്പ്യൂട്ടറും അനുബന്ധ ഉപകരണങ്ങളും അനുവദിച്ചു.

തണ്ണിത്തോട് ഗ്രാമപഞ്ചായത്തിലെ മണ്ണീറ വാര്‍ഡിലെ ഉപതിരഞ്ഞെടുപ്പിനുള്ള നാമനിര്‍ദേശ പത്രികകള്‍ ഈമാസം ഒന്‍പതു വരെ സ്വീകരിക്കുമെന്ന് റിട്ടേണിംഗ് ഓഫീസറായ കോന്നി സോഷ്യല്‍ ഫോറസ്ട്രി അസിസ്റ്റന്റ് കണ്‍സര്‍വേറ്റര്‍ അറിയിച്ചു. പത്രികകളുടെ സൂക്ഷ്മ പരിശോധന ഈമാസം 12ന് രാവിലെ 11ന് കോന്നി എലിയറയ്ക്കലുള്ള സോഷ്യല്‍ ഫോറസ്ട്രി ഡിവിഷന്‍ ഓഫീസില്‍ നടക്കും. ഈമാസം 14ന് ഉച്ചയ്ക്ക് ശേഷം മൂന്നുവരെ പത്രികകള്‍ പിന്‍വലിക്കാമെന്നും റിട്ടേണിംഗ് ഓഫീസര്‍ അറിയിച്ചു. 

      ജില്ലയിലെ എന്‍ഡോസള്‍ഫാന്‍ ദുരിതനിവാരണ പ്രവര്‍ത്തനങ്ങള്‍ ഏകോപിപ്പിക്കുന്നതിനും  അവലോകനം ചെയ്യുന്നതിനുമായുളള ജില്ലാതല സെല്ലിന്റെ യോഗം  ഇന്ന് (8) രാവിലെ  11 മണിക്ക്  റവന്യൂ-ഭവന നിര്‍മ്മാണ വകുപ്പ് മന്ത്രി  ഇ ചന്ദ്രശേഖരന്റെ  അധ്യക്ഷതയില്‍ കളക്ടറേറ്റ് കോണ്‍ഫറന്‍സ് ഹാളില്‍ ചേരും.