കൊയിലാണ്ടി നഗരത്തിലെ മാര്‍ക്കറ്റുകളില്‍ അതീവ ജാഗ്രത പുലര്‍ത്തണമെന്ന് നഗരസഭാ ചെയര്‍മാന്‍ അഡ്വ. കെ.സത്യന്‍ പറഞ്ഞു. ജൂലായ് അഞ്ചിന് കൊയിലാണ്ടി മാര്‍ക്കറ്റില്‍ പച്ചക്കായ ഇറക്കിയ ലോറി ഡ്രൈവര്‍ക്ക് കോവിഡ് സ്ഥിരീകരിച്ച സാഹചര്യത്തില്‍ മാര്‍ക്കറ്റിലെ മൂന്ന് കടകള്‍ താല്‍ക്കാലികമായി അടപ്പിക്കുകയും ചുമട്ടുതൊഴിലാളികള്‍ ഉള്‍പ്പെടെ പത്തോളം തൊഴിലാളികളെ നിരീക്ഷണത്തിലാക്കുകയും ചെയ്തു. ഇവര്‍ക്ക് അടിയന്തരമായി കോവിഡ് പരിശോധന നടത്താന്‍ തീരുമാനിച്ചു. ഈ സാഹചര്യത്തില്‍ നഗരത്തില്‍ എത്തുന്ന എല്ലാവരും തികഞ്ഞ ജാഗ്രത പുലര്‍ത്തണമെന്ന് ചെയര്‍മാന്‍  അറിയിച്ചു.

കോവിഡ് ജാഗ്രതയുടെ ഭാഗമായി സമൂഹ വ്യാപനം തടയുന്നതിന് കൊയിലാണ്ടി നഗരത്തില്‍ കര്‍ശനമായ നിയന്ത്രണം ഏര്‍പ്പെടുത്താന്‍ തീരുമാനിച്ചു.  നടപടി സംബന്ധിച്ച് വടകര ആര്‍ഡിഒ വി.പി. അബ്ദുറഹിമാന്‍ വിവിധ വകുപ്പ് ഉദ്യോഗസ്ഥരുടെ യോഗം വിളിച്ചു ചേര്‍ത്തു. 

കൊയിലാണ്ടി താലൂക്കാശുപത്രിയിലെ സി.ടി. സ്‌കാന്‍ ഉദ്ഘാടനം നാളെ (ജൂലൈ 15) ഉച്ചക്ക് 12.30ന്  ആരോഗ്യ മന്ത്രി കെ.കെ ശൈലജ ടീച്ചര്‍ വീഡിയോ കോണ്‍ഫറന്‍സിലൂടെ നിര്‍വ്വഹിക്കും. കെ.ദാസന്‍ എംഎല്‍എ അധ്യക്ഷത വഹിക്കും. 2.59 കോടി രൂപ ചെലവിലാണ് സി.ടി. സ്‌കാന്‍ സജ്ജമാക്കിയത്. മലബാറിലെ താലൂക്കാശുപത്രികളില്‍ ആദ്യത്തെ സി.ടി. സ്‌കാന്‍ മെഷീനാണ് കൊയിലാണ്ടിയില്‍ സ്ഥാപിക്കുന്നത്. 

വടകര ബ്ലോക്ക് സമ്പൂര്‍ണ്ണ ശുചിത്വ പദവി പ്രഖ്യാപനത്തിലേക്ക്.  പ്രഖ്യാപനം സംബന്ധിച്ച് ബ്ലോക്ക് പരിധിയിലെ ചോറോട്, ഒഞ്ചിയം, അഴിയൂര്‍, ഏറാമല പഞ്ചായത്തുകളെ ഉള്‍പ്പെടുത്തി വടകര ബ്ലോക്ക് ഓഫീസ് ഹാളില്‍ യോഗം ചേര്‍ന്നു.  എല്ലാ വീടുകളിലും സ്ഥാപനങ്ങളിലും ഏതെങ്കിലും മാതൃകയിലുള്ള ഉറവിട മാലിന്യ സംസ്‌കരണ ഉപാധികള്‍, പൊതുഇടങ്ങളിലെ ജൈവമാലിന്യം സംസ്‌കരിക്കുതിനുള്ള സൗകര്യങ്ങള്‍, മാലിന്യരഹിതമായ പൊതുവിടങ്ങള്‍, വൃത്തിയുള്ള പൊതു ടോയ്ലറ്റുകള്‍, പൊതുപരിപാടികളിലും ആഘോഷങ്ങളിലും ഹരിതചട്ടം പാലിക്കല്‍, ഫലപ്രദമായി പ്ലാസ്റ്റിക് നിരോധനം നടപ്പിലാക്കുക തുടങ്ങിയവയാണ് ശുചിത്വ പദവിക്കായി പരിഗണിക്കുന്ന ഘടകങ്ങള്‍. 

 സംസ്ഥാന സര്‍ക്കാരിന്റെ നിര്‍ദേശപ്രകാരം തദ്ദേശസ്വയംഭരണസ്ഥാപനങ്ങള്‍ തയ്യാറാക്കി നല്‍കേണ്ട 'നമ്മള്‍ നമുക്കായി' ദുരന്ത പ്രതികരണ ആസൂത്രണരേഖ അഴിയൂര്‍ ഗ്രാമ പഞ്ചായത്ത് ജില്ലാ പ്ലാനിങ് കമ്മിറ്റിക്കു സമര്‍പ്പിച്ചു. 2004ലെ സുനാമി, 2009ലെ വെള്ളപ്പൊക്കം എന്നീ പ്രകൃതിദുരന്തങ്ങളില്‍നിന്ന് പാഠമുള്‍ക്കൊണ്ട് കാലാവസ്ഥാവ്യതിയാനം ,ദുരന്ത സാധ്യതകളുടെ വിശകലനം, ദുരന്ത മുന്നൊരുക്കം, അപകട ലഘൂകരണം, സാമൂഹ്യ ശാക്തീകരണം, ദുരന്തമുണ്ടായാല്‍ സ്വീകരിക്കേണ്ട നടപടികള്‍, ദുരന്ത മുഖത്ത് അത്യാവശ്യമുള്ള ഫോണ്‍ നമ്പറുകള്‍,  എന്നിവ ഉള്‍പ്പെടുത്തിയ വിശദമായ രേഖയാണ് സമര്‍പ്പിച്ചത്.

നടുവണ്ണൂര്‍ ഗ്രാമപഞ്ചായത്തില്‍  മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയില്‍ ഉള്‍പ്പെടുത്തി  നിര്‍മ്മിക്കുന്ന രണ്ട് റോഡുകളുടെ പ്രവൃത്തി ഉദ്ഘാടനം  പുരുഷന്‍ കടലുണ്ടിഎം. എല്‍  എ ഇന്ന്(ജൂലൈ 14) നിര്‍വഹിക്കും. രാവിലെ 10 ന്  വെങ്ങളത്ത്കണ്ടി തറോല്‍ മീത്തല്‍  റോഡ്,  12 മണിക്ക് കാവില്‍ തുരുത്തിമുക്ക് റോഡ് എന്നിവയുടെ പ്രവൃത്തി ഉദ്ഘടനമാണ് എം. എല്‍. എ നിര്‍വഹിക്കുക.  വെങ്ങളത്ത്കണ്ടി തറോല്‍ മീത്തല്‍  റോഡിന്  30 ലക്ഷവും  കാവില്‍ തുരുത്തിമുക്ക് റോഡിന് 40 ലക്ഷവും ചെലവഴിച്ചാണ് പ്രവൃത്തി നടക്കുക. ചടങ്ങില്‍ നടുവണ്ണൂര്‍ ഗ്രാമപഞ്ചായത്ത് പ്രസിഡണ്ട് യശോദ തെങ്ങിട അധ്യക്ഷത വഹിക്കും.

ജില്ലയിലെ സുഭിഷ കേരളം പദ്ധതി കാര്യക്ഷമമാക്കുന്നതിന് ആവശ്യമായ നടപടി സ്വീകരിക്കാന്‍ ജില്ലാ ആസൂത്രണ സമിതി യോഗം തീരുമാനിച്ചു.ധനകാര്യ കമ്മീഷന്‍ ഫണ്ട് അടിസ്ഥാനപ്പെടുത്തി പദ്ധതി പുന:പരിശോധിച്ച് തദ്ദേശസ്വയംഭരണ സ്ഥാപനങ്ങള്‍ ആസൂത്രണ സമിതിയുടെ അംഗീകാരം എത്രയും വേഗം വാങ്ങണമെന്ന് ജില്ലാ പഞ്ചായത്ത് പ്രസിഡന്റ് ബാബു പറശേരി പറഞ്ഞു.

 പദ്ധതി നിര്‍വഹണത്തില്‍ തദ്ദേശസ്വയംഭരണ സ്ഥാപനങ്ങള്‍ കൂടുതല്‍ ശ്രദ്ധ ചെലുത്തണമെന്ന് ജില്ലാ കലക്ടര്‍ സാംബശിവ റാവു പറഞ്ഞു. ഇവ മോണിറ്റര്‍ ചെയ്യുന്നതിന് ബന്ധപ്പെട്ട ജില്ലാതല ഉദ്യോഗസ്ഥര്‍ പ്രത്യേക സംവിധാനമേര്‍പ്പെടുത്തണമെന്നും കലക്ടര്‍ നിര്‍ദേശം നല്‍കി.

രോഗവ്യാപനം കൂടുന്ന സാഹചര്യത്തില്‍ ജില്ലയിലെ കോവിഡ് പ്രതിരോധ പ്രവര്‍ത്തനങ്ങള്‍ ഊര്‍ജ്ജിതപ്പെടുത്താന്‍ തദ്ദേശ സ്ഥാപനങ്ങള്‍ക്ക് ജില്ലാ കലക്ടര്‍ സാംബശിവ റാവു നിര്‍ദേശം നല്‍കി. തദ്ദേശ സ്ഥാപനങ്ങളിലെ കണ്‍ട്രോള്‍ റൂമൂകളുടെ പ്രവര്‍ത്തനം കാര്യക്ഷമമാക്കണം.24 മണിക്കൂറും സേവനം ലഭ്യമാക്കണം. മതിയായ ഉദ്യോഗസ്ഥരും ആവശ്യത്തിന് ഉപകരണങ്ങളും കണ്‍ട്രോള്‍ റൂമില്‍ ഉറപ്പുവരുത്തണം.