മന്ത്രി രാമചന്ദ്രന്‍ കടന്നപ്പള്ളിയുടെ പ്രാദേശിക വികസന നിധിയില്‍ നിന്നും കണ്ണൂര്‍ നിയോജക മണ്ഡലത്തിലെ നാല് സ്‌കൂളുകളുടെ പശ്ചാത്തല സൗകര്യ വികസനത്തിന് അനുവദിച്ച നാല് കോടി രൂപയുടെ പ്രവൃത്തികള്‍ക്ക് ഭരണാനുമതിയായി. പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി ഗവ. ടൗണ്‍ എച്ച് എസ് എസ്, ഗവ. സിറ്റി എച്ച് എസ് എസ് കണ്ണൂര്‍, ഗവ. എച്ച് എസ് എസ് ചേലോറ, ഗവ. മിക്സഡ് യു പി സ്‌കൂള്‍ തളാപ്പ് എന്നീ സ്‌കൂളുകളില്‍ വിവിധ വികസന പ്രവര്‍ത്തനങ്ങള്‍ക്കായി ഓരോ കോടി രൂപ വീതമാണ് അനുവദിച്ചത്. 

ഇംഗ്ലീഷ് ഭാഷയില്‍ സംസാരിക്കാനും എഴുതാനുമുള്ള പേടിയും മടിയും മാറ്റിയെടുക്കുകയെന്ന ലക്ഷ്യത്തോടെ സമഗ്ര ശിക്ഷാ കേരളയുടെ നേതൃത്വത്തില്‍ നടക്കുന്ന ഇംഗ്ലീഷ് പഠനപോഷണ പരിപാടിക്ക് തുടക്കമായി. ഹയര്‍സെക്കണ്ടറി വിദ്യാഭ്യാസ വകുപ്പുമായി ചേര്‍ന്ന് സംസ്ഥാനതലത്തില്‍ തെരഞ്ഞെടുക്കപ്പെട്ട സ്‌കൂളുകളില്‍ നടപ്പിലാക്കുന്ന പദ്ധതിയുടെഭാഗമായുള്ള ആദ്യ ക്യാംപ് കൊയ്യം ഗവ. ഹയര്‍സെക്കണ്ടറി സ്‌കൂളില്‍ നടന്നു. ജില്ലാ പഞ്ചായത്ത് പ്രസിഡണ്ട് കെ വി സുമേഷ് ഉദ്ഘാടനം ചെയ്തു. 

സംസ്ഥാന ടൂറിസം വകുപ്പ് സംഘടിപ്പിക്കുന്ന 2019 ലെ പുതുവർഷ വാരാഘോഷത്തോടനുബന്ധിച്ച് സി.സി.ടി.വി ക്യാമറകളും എൽ.ഇ.ഡി ടി.വികളും താത്കാലികമായി സ്ഥാപിക്കാൻ ക്വട്ടേഷൻ ക്ഷണിച്ചു.  തിരുവനന്തപുരം നഗരത്തിൽ സുരക്ഷാ ക്രമീകരണം ശക്തമാക്കുന്നതിന്റെ ഭാഗമായി വിവിധ പരിപാടികൾ നടക്കുന്ന സ്ഥലങ്ങൾ ഉൾപ്പെടെയുള്ള സുരക്ഷാ മേഖലകളിൽ ജനുവരി 11 മുതൽ 20 വരെ 30 സി.സി.ടി.വി ക്യാമറകളും മൂന്ന് എൽ.ഇ.ഡി ടി.വി യും താത്കാലിക അടിസ്ഥാനത്തിലാണ് സ്ഥാപിക്കുന്നത്.  താല്പര്യമുള്ളവരുടെ ക്വട്ടേഷനുകൽ ജനുവരി ഒൻപതിന് വൈകുന്നേരം നാല് മണിക്കു മുൻപ് തിരുവനന്തപുരം സിറ്റി ജില്ലാ പോലീസ് മേധാവിയുടെ കാര്യാലയത്തിൽ സമർപ്പിക്കണം.

കേരള വനഗവേഷണ സ്ഥാപനത്തിൽ മൂന്നു മാസം കാലാവധിയുള്ള ഒരു സമയബന്ധിത ഗവേഷണ പദ്ധതിയായ 'ഇംപാക്ട് ഓഫ് ഫ്‌ളഡ് ഓൺ ഫ്‌ളോറൽ എലമെന്റസ് & സോയിൽ ബയോട്ട ഇൻ പമ്പ, പെരിയാർ, ഭാരതപ്പുഴ & ചാലക്കുടി റിവേഴ്‌സ് ഇൻ കേരള'യിൽ മൂന്ന് പ്രോജക്ട് ഫെല്ലോയുടെ താൽക്കാലിക ഒഴിവുകളുണ്ട്. ജനുവരി 10 ന് രാവിലെ 10 ന് സ്ഥാപനത്തിന്റെ തൃശ്ശൂർ പീച്ചിയിലുള്ള ഓഫീസിൽ വാക്-ഇൻ-ഇന്റർവ്യു നടത്തും. വിശദ വിവരങ്ങൾക്ക് www.kfri.res.in     സന്ദർശിക്കുക.