മഞ്ചേരി-എളങ്കൂര്‍-വണ്ടൂര്‍ റോഡില്‍ ഇന്ന് (സെപ്തംബര്‍ 26) രാവിലെ എട്ടു മുതല്‍ നവീകരണ പ്രവൃത്തികള്‍ നടക്കുന്നതിനാല്‍ പ്രവൃത്തി തീരുന്നതുവരെ വാഹനഗതാഗതം നിരോധിച്ചു. വണ്ടൂര്‍ ഭാഗത്തു നിന്ന്  വരുന്ന വാഹനങ്ങള്‍ കാരക്കുന്ന്- തിരുവാലി വഴി തിരിച്ചു പോകണമെന്ന് എക്‌സിക്യൂട്ടീവ് എഞ്ചിനീയര്‍ അറിയിച്ചു.

അരീക്കോട് ഐസിഡിഎസ് പ്രൊജക്ടിന്റെ ഉപയോഗത്തിനായി 2020-21 സാമ്പത്തിക വര്‍ഷത്തേക്ക് വാഹനം (ജീപ്പ്/കാര്‍) കരാര്‍ അടിസ്ഥാനത്തില്‍ വാടകയ്ക്ക് ഉപയോഗിക്കുന്നതിന് സന്നദ്ധരായ സ്ഥാപനങ്ങള്‍/വ്യക്തികളില്‍ നിന്ന്  ടെന്‍ഡറുകള്‍ ക്ഷണിച്ചു. ദര്‍ഘാസ് ഫോം സ്വീകരിക്കുന്ന  അവസാന തീയതി ഒക്‌ടോബര്‍ 12. ദര്‍ഘാസ് ഫോമിന് അരീക്കോട് ഐ.സി.ഡി.എസ് പ്രൊജക്ട് ഓഫീസുമായി ബന്ധപ്പെടണമെന്ന് ശിശുവികസന പദ്ധതി ഓഫീസര്‍ അറിയിച്ചു.
 

കരിങ്കല്ലത്താണി ഗവ. വനിതാ ഐ.ടി.ഐയിലേക്ക്  എസ്.എസ്.എല്‍.സി യോഗ്യതയുള്ള പെണ്‍കുട്ടികളില്‍ നിന്ന് വിവിധ ട്രേഡുകളിലേക്ക് ഓണ്‍ലൈനായി അപേക്ഷ ക്ഷണിച്ചു. ഇലക്‌ട്രോണിക്‌സ,് മെക്കാനിക്ക,് ഡിസിവില്‍  ട്രേഡുകളിലേക്കാണ് അപേക്ഷ ക്ഷണിച്ചത്.  താത്പര്യമുള്ളവര്‍ക്ക് സെപ്തംബര്‍ 30 വരെ അപേക്ഷ സമര്‍പ്പിക്കാം. ഫോണ്‍: 04933 250700.
 

മലപ്പുറം, തിരൂര്‍ നഗരസഭകളിലെ ഡി.ടി.പി സ്‌കീം പുതുക്കുന്നതിന്റെ ഭാഗമായി ലാന്‍ഡ് യൂസ്/ സ്ട്രക്ചറല്‍ മാപ്പ് തയ്യാറാക്കുന്നതിന്  സര്‍വേയര്‍മാരെ ദിവസവേതനാടിസ്ഥാനത്തില്‍ നിയമിക്കുന്നു. ഐ.ടി.ഐ സിവില്‍, സര്‍വേ അല്ലെങ്കില്‍ തത്തുല്യമായ യോഗ്യതയുള്ളവര്‍ക്കും സര്‍വേയില്‍ മുന്‍പരിചയമുള്ളവര്‍ക്കും അപേക്ഷിക്കാം.  താത്പര്യമുള്ള ഉദ്യോഗാര്‍ത്ഥികള്‍ ഒക്‌ടോബര്‍ അഞ്ചിനകം  
മലപ്പുറം സിവില്‍ സ്‌റ്റേഷനിലെ നഗരാസൂത്രണ കാര്യാലയത്തില്‍ അപേക്ഷ സമര്‍പ്പിക്കണം. ഫോണ്‍: 0483: 2734997.

മലപ്പുറം സര്‍ക്കാര്‍ വനിതാ ആര്‍ട്‌സ് ആന്‍ഡ് സയന്‍സ് കോളജില്‍ ഹിസ്റ്ററി, മാത്‌സ് വിഷയങ്ങളില്‍ അതിഥി അധ്യാപകരെ നിയമിക്കുന്നു. നെറ്റ് യോഗ്യതയുള്ള,  കോഴിക്കോട് ഡി.ഡി.ഇയില്‍ രജിസ്റ്റര്‍ ചെയ്ത, ഉദ്യോഗാര്‍ത്ഥികള്‍ക്ക്  ഒക്‌ടോബര്‍ അഞ്ചിന് രാവിലെ 10ന് കോളജില്‍ നടക്കുന്ന അഭിമുഖത്തിന് അസ്സല്‍ സര്‍ട്ടിഫിക്കറ്റും അവയുടെ പകര്‍പ്പും സഹിതം പങ്കെടുക്കാം.

കാട്ടിലങ്ങാടി സൗത്തില്‍ നിര്‍മിച്ച കിഴക്കകത്ത് മൊയ്തീന്‍ സ്മാരക അങ്കണവാടിയുടെ പുതിയ കെട്ടിടം വി.അബ്ദുറഹ്മാന്‍ എം.എല്‍.എ ഉദ്ഘാടനം ചെയ്തു. എം.എല്‍.എ എസ്.ഡി.എഫില്‍ ഉള്‍പ്പെടുത്തി അനുവദിച്ച 14 ലക്ഷം രൂപ വിനിയോഗിച്ചാണ് പുതിയ കെട്ടിടം നിര്‍മിച്ചത്. ചടങ്ങില്‍ താനൂര്‍ നഗരസഭ ചെയര്‍ പേഴ്‌സണ്‍ സി.കെ സുബൈദ അധ്യക്ഷയായി. താനൂര്‍ നഗരസഭ അസിസ്റ്റന്റ് എഞ്ചിനീയര്‍ ബിന്ദു റിപ്പോര്‍ട്ട് അവതരിപ്പിച്ചു.

തെന്നല ഗ്രാമപഞ്ചായത്തിലെ കുറ്റിപ്പാലയില്‍  പ്രാഥമികാരോഗ്യ കേന്ദ്രത്തിന്  പുതിയ കെട്ടിടം. പി.കെ അബ്ദുറബ് എം.എല്‍.എയുടെ ആസ്തി വികസന ഫണ്ടില്‍ നിന്ന്  50 ലക്ഷം രൂപ വിനിയോഗിച്ചാണ് ആധുനിക സൗകര്യങ്ങളോടു കൂടിയ പുതിയ കെട്ടിടമൊരുക്കിയത്. പുതിയ കെട്ടിടം  പി.കെ അബ്ദുറബ് എം.എല്‍.എ ഉദ്ഘാടനം ചെയ്തു. തെന്നല ഗ്രാമപഞ്ചായത്ത് പ്രസിഡന്റ്—എം.പി കുഞ്ഞിമൊയ്തീന്‍ അധ്യക്ഷനായി. ജനപ്രതിനിധികളായ സലീന കരുമ്പില്‍, മാതോളി നഫീസു, കെ.അബ്ദുല്‍ ഗഫൂര്‍, ടി.വി നൗഷാദ്, കെ.വി സൈതാലി തുടങ്ങിയവര്‍ പങ്കെടുത്തു.

തെന്നല ഗ്രാമപഞ്ചായത്തിലെ പൂക്കിപറമ്പ്-അറക്കല്‍-ഒഴൂര്‍റോഡ് റബറൈസ് ചെയ്യുന്ന പ്രവൃത്തിയ്ക്ക് തുടക്കമായി. പി.കെ അബ്ദുറബ് എം.എല്‍.എ യുടെ ആസ്തി വികസന ഫണ്ടില്‍ നിന്ന് രണ്ട് കോടി രൂപ വിനിയോഗിച്ച്  ബിഎം  ആന്‍ഡ് ബിസി ചെയ്തു നവീകരിക്കുന്ന പ്രവൃത്തിയാണ് തുടങ്ങിയത്. പ്രവൃത്തിയുടെ ഉദ്ഘാടനം പി.കെ അബ്ദുറബ്് എം.എല്‍.എ നിര്‍വഹിച്ചു. ഗ്രാമപഞ്ചായത്ത് പ്രസിഡന്റ് എം.പി കുഞ്ഞിമൊയ്തീന്‍ അധ്യക്ഷനായി.

ജില്ലയിലെ കുടുംബാരോഗ്യ കേന്ദ്രങ്ങളുടെയും ആദിവാസി - തീരദേശ മേഖലകളുള്‍പ്പെടെ 166 ഉപകേന്ദ്രങ്ങളുടെയും നിര്‍മാണ പുനരുദ്ധാരണ പ്രവര്‍ത്തനങ്ങള്‍ക്ക് ആറ് കോടി 63 ലക്ഷം രൂപ അനുവദിച്ചു. പഞ്ചായത്ത് തലങ്ങളില്‍ പ്രാഥമികാരോഗ്യ ആവശ്യങ്ങള്‍ പൂര്‍ണമായും നിറവേറ്റപ്പെടുക എന്ന ലക്ഷ്യം പൂര്‍ത്തീകരിക്കുന്നതിനാണ് ഉപകേന്ദ്രങ്ങളെ ശക്തിപ്പെടുത്തുന്നത്. ജില്ലയില്‍ 589 ഉപകേന്ദ്രങ്ങളാണുളളത്. ഓരോ കുടുംബത്തിന്റെയും ആരോഗ്യ -ആരോഗ്യാനുബന്ധ വിഷയങ്ങളില്‍ ഇടപെട്ടുകൊണ്ട് ജനങ്ങള്‍ക്ക്  സമഗ്ര ആരോഗ്യപരിരക്ഷ ഉറപ്പ് വരുത്തുക എന്നതാണ് ഓരോ ഉപകേന്ദ്രത്തിന്റെയും ലക്ഷ്യം.